Марапатсүйер мырза. Ақтөбе облысында әкім өзін-өзі "Құрметті азамат" медалімен марапаттаған

Ақтөбе облысы, Темір ауданының әкімі өзін-өзі марапаттаған. Марапатсүйер әкім өзін ауданның "Құрметті азаматы" медалімен алқалаған. Саламат Аманбаев “Темір ауданының Құрметті азаматы” куәлігіне өзі қол қойған, Alash.kz ұлттық порталы. 

Stan.kz ақпарат агенттігінің хабарлауынша, өткен жылдың 20 желтоқсанында аудандық ардагерлер кеңесінің төрағасы әкімге осы атақты беру туралы ұсыныс жолдаған. Ол 2 күн ішінде қолдау тауып, 22 желтоқсанда комиссия отырысы өткен. “Маңызды мәселе” көтерілген мәслихат отырысына 12 депутат қатысып, қолдай кеткен. Олар 3 күн ішінде шешім шығарып, 25 желтоқсанда марапатты табыстаған.

Депутаттар Саламат Аманбаевқа Темір ауданының әлеуметтік-экономикалық дамуына елеулі үлес қосып, су тартып, асфальт төсеп, ауданды абаттандырғаны үшін алғыс айтқан.

Саламат Аманбаев аталмыш қызметте 2021 жылдың наурызынан бері отыр.

Айта кетейік, биыл су тасқыны кезінде Темір ауданында 57 үй қирап қалды. Өңір тасқын кезінде 600 миллион теңгеден аса шығынға батты. Сондай-ақ мектеп оқушысының өлімі тіркелді.