Ақтау қаласындағы коррекциялық орталықтарының бірінде қараусыз қалған үш баланың бірі үшінші қабаттың терезесінен құлап кетіп, алған ауыр жарақаттарынан екі айдан кейін Алматы ауруханасында көз жұмды, деп хабарлайды Alash.kz.
Қайтыс болған 8 жасар Нұрәлі есімді баланың ІІІ топтағы мүгедектігі болған. Қазіргі уақытта осы оқиғаға байланысты құқық қорғау органдары қылмыстық іс қозғап, тергеу амалдарын жүргізіп жатыр.
Жақындарының мәлімдеуінше, оқыс оқиға балалардың бірі терезені ашқан сәтте болған. Терезеден сыртқа қарай шар ұшып кетіп, Нұрәлі оны ұстап қалмақшы болғанда теңселіп төменге құлаған. Биіктіктен құлау салдарынан бала омыртқа, жамбас сүйектерінің сынуы және ішкі мүшелерінің зақымдануы сияқты өте ауыр жарақаттар алған болатын.
Аталған факті бойынша «Балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамау» бабымен қылмыстық іс қозғалды. Алайда зардап шеккен тараптың туыстары тергеу жұмыстарының баяу жүріп жатқанына наразылық білдіруде. Олар мекеме терезелерінде неліктен арнайы шектегіштер мен қорғаныс торларының орнатылмағанын және балалардың не себепті бақылаусыз қалғанын анықтап, кінәлі тұлғаларды заңды жауапкершілікке тартуды талап етіп отыр.
