Саналы ғұмырын медицинаға арнап, денсаулық сақтау министрі болған Қазақстанның еңбек сіңірген қайраткері Талапқали Ізмұхамбетов қайтыс болды, деп хабарлайды Alash.KZ ұлттық порталы.
"Бүгін еліміздің бұрынғы Денсаулық сақтау министрі, медицина ғылымдарының кандидаты, Қазақстан Республикасының Еңбек сіңірген қызметкері, КСРО денсаулық сақтау үздігі, медицина қызметкерлерінің көптеген ұрпақтарының тәлімгері Талапқали Әбішұлы Ізмұхамбетов қайтыс болды", - делінген ДМС мәліметінде.
Талапқали Әбішұлы өзінің кәсіби қызметін хирург дәрігерден бастаған, содан кейін аудандық орталық аурухананың бас дәрігері, Шығыс Қазақстан және Алматы облыстық денсаулық сақтау бөлімдері меңгерушісінің орынбасары және меңгерушісі болып жұмыс істеген. 1987-1990 жылдары Қазақ КСР Денсаулық сақтау министрі қызметін атқарды.
"Медициналық қоғамдастықтың, көптеген студенттердің, әріптестердің есінде ол жарқын ерекше тұлға, өз ісінің үлкен энтузиасты болып қала береді, ол ұлтты сауықтыру бойынша бірқатар ірі бастамалардың авторы болды.
Денсаулық сақтау министрлігі Ұлы дәрігердің барлық жақындары мен туыстарына қайғыларына ортақтасып көңіл айтады. Талапқали Әбішұлының баға жетпес еңбектері, ауқымды идеялары қазақстандықтардың көптеген ұрпақтарының денсаулығы үшін қызмет ететін болады", - делінген хабарламада.
