Алматыда "Warner Bros" атын жамылған криптопирамида әшкереленді

Алматы қаласы бойынша ҚМА департаменті «Warner Bros» атауын пайдаланып құрылған қаржы пирамидасын ұйымдастыру және басқару дерегі бойынша тергеуді аяқтады, деп хабарлайды Alash.kz

Тергеу мәліметінше, ұйымдастырушылар азаматтарды жоғары табыс уәдесімен инвестиция салуға тартқан. Жобаға заңды реңк беру үшін оның атауында Голливудтағы белгілі компанияның бренді қолданылған. Қатысушыларға фильм трейлерлерін көру және жаңа инвесторлар шақыру арқылы пайда табу ұсынылған.

Пирамида 9 деңгейден тұрған. Орташа салым — 225 мың теңге. Барлық төлемдер тек USDT криптовалютасында қабылданған.

Схеманы кеңейту үшін әлеуметтік желілер мен мессенджерлерде арнайы чаттар ашылып, оқыту, нұсқаулықтар, бейнероликтер таратылған. Ұйымдастырушылар қатысушыларға «жылдам табыс» пен криптовалюта түріндегі сыйақы уәде еткен.

Тергеу барысында салымшылардың ақшасы сақталған және аударылған криптоәмияндар анықталды. Сот санкциясымен 3,8 млн USDT көлеміндегі криптоактивтерге тыйым салынды.

Сот үкімі бойынша ұйымдастырушы 5 жылға бас бостандығынан айырылды. Сондай-ақ, 40 жәбірленушінің азаматтық талаптары қанағаттандырылып, олардың залалы тыйым салынған криптоактивтер есебінен өтелетін болды.

Үкім заңды күшіне енген жоқ.