Бұрынғы футболшы, белгілі төреші әрі жаттықтырушы Николай Семенович Дрютов 2026 жылдың 17 қарашасында 81 жасында дүниеден өтті, деп хабарлайды Alash.kz.
Қазақстан футбол федерациясы ресми сайтында марқұмның отбасы мен туған-туыстарына, жақындарына және оны танитын барлық жанға қайғыра көңіл айтты. Федерация өкілдері Николай Дрютовтың өмір жолын спортқа және өз ісіне деген адалдық пен өскелең ұрпаққа көрсетілген шынайы қамқорлықтың үлгісі ретінде атап өтіп, оның есімі елорда мен бүкіл отандық футбол тарихында мәңгі сақталатынын жеткізді.

Николай Дрютов Ресейдің Воронеж облысында дүниеге келгенімен, оның бүкіл ғұмыры мен кәсіби мансабы елордамен тығыз байланысты өрбіді. Ол Целиноградтағы «Локомотив» балалар мен жасөспірімдер спорт мектебінің түлегі атанып, жергілікті «Динамо» командасының сапында шабуылшы ретінде өнер көрсетті. Кейіннен елордадағы спорт және дене шынықтыру комитетіне жетекшілік етіп, қалалық спорт департаментінде басшылық лауазымдарды атқарды. Сондай-ақ астаналық «Жеңіс» футбол клубының қалыптасуы мен өркендеуіне зор еңбек сіңірді.