Еліміздің дарынды оқушылары Панама қаласында өткен әлемдік робототехника чемпионатында төрт дүркін әлем чемпионы атанды. Қуанышты жаңалықты Мәжіліс депутаты Асхат Аймағамбетов желідегі парақшасында сүйіншіледі, деп жазады Alash.kz ұлттық порталы.
“Қазақстан – робототехникадан төрт дүркін әлем чемпионы!
FIRST Global Challenge 2025 жеңімпазы – біздің оқушыларымыз!
Керемет жаңалық! Қазақстан командасы биыл Панама қаласында өткен әлемдік робототехника олимпиадасында тағы да топ жарды. Бұл – төртінші чемпиондық! Бұған дейін біз жеңісті Женевада, Сингапурда және Афинада еншілеген едік.
Бұл жеңіс – оқушылардың, ұстаздардың, тәлімгерлер мен ата-аналардың қажырлы еңбегінің нәтижесі.
Министрлікте қызмет еткен жылдары робототехника кабинеттерін ашып, хакатондар мен жарыстар өткіздік, IT-лицейлер құрдық, мектептерді цифрлық жабдықтармен қамтамасыз ету нормативтеріне робототехниканы енгіздік. Бұл жұмысты қазір жақсы жалғасып келеді.
Ерекше алғыс – USTEM Foundation жетекшісі Асылбек Мурзахметовке
Мемлекет басшысы Қасым-Жомарт Тоқаев цифрлық білім беруге ерекше мән беріп отыр. Мектептерде бағдарламалау, 3D модельдеу секілді бағыттардың дамуына үлкен қолдау көрсетілуде.
Бұл жеңіс – біздің еліміздегі білім мен технологияның болашағының жарқын екенінің дәлелі.
Балаларымызды мақтан етеміз!
Алға, Қазақстан!”,- деп жазды Асхат Аймағамбетов.
