Полиция департаменті таратқан ресми мәліметке сәйкес, тергеу басқармасының өндірісінде ҚР Қылмыстық кодексінің 190-бабының 3-бөлігі («Ірі көлемдегі алаяқтық») бойынша қылмыстық іс жүргізіліп жатыр, деп жазады Alash.KZ.
Тергеу деректеріне қарағанда, «Тендер биржасы» деп аталатын жобаның негізін қалаушысы ретінде белгілі Шыңғыс Құрманғалиев азаматтардан және кәсіпкерлерден ақшалай қаражат алып, оларды мемлекеттік сатып алуларға қатысты қызметтермен, түрлі делдалдық мүмкіндіктермен немесе кепілді табысқа уәде берумен алдаған деген күдікке ілінді.
Құрманғалиев қазіргі уақытта уақытша ұстау изоляторына қамалған. Тергеу соты оған қатысты бұлтартпау шарасы ретінде қамауда ұстауды санкциялаған.
Ақпаратты Алматы ПД растады.
«Кәсіпкер изоляторға жіберілді. Сот қамауға алу түріндегі бұлтартпау шарасын таңдады. Тергеу басқармасы істі ҚР ҚК-ның 190-бабы (3-бөлігі) «алаяқтық» бойынша тергеп-тексеруде», —деп жауап берді полицейлер редакцияның сұрауына.
Полиция тергеудің жалғасып жатқанын мәлімдеп, күдіктінің әрекетінен зардап шеккен болуы мүмкін азаматтарды құқық қорғау органдарына жүгінуге шақырды. Тергеу барысында қаржы қозғалысы, тартылған тұлғалардың саны, сондай-ақ күдікті басқарған платформаның нақты қызметі мен заңдылығы тексеріліп жатыр.
Сонымен қатар, мамандар мұндай істердің жиілеп кеткенін атап, азаматтарды интернет-платформалар мен қаржы уәделеріне қатысты сақ болуға шақырды. Полиция кез келген күдікті жобаның лицензиясын, заңды мекенжайын және құжаттарын тексеру қажеттігін ескертті.
