СҚО-да комиссия мүмкіндігі шектеулі жасөспірімге мүгедектігі үшін берілетін ақшаны неге қиып тастаған?

Солтүстік Қазақстан облысында сот мүмкіндігі шектеулі жасөспірімнің құқығын қорғап, медициналық-әлеуметтік сараптама комиссиясының шешімін заңсыз деп таныды, деп жазады Alash.KZ

СҚО сотының дерегіне сүйенсек, сотқа баланың анасы жүгінген. Ол ұлының ерте жастан бері ювенильді идиопатиялық артрит сияқты созылмалы дертпен ауыратынын жеткізген. Бұл ауру буындардың ауырсынуына, қозғалыстың шектелуіне және аяқ-қолдың деформациясына әкелуі мүмкін. Осы себепті бала тұрақты түрде дәрігерлердің бақылауында болып, ұзақ уақыт ем қабылдаған. Оған қоса, тізе буындарына ота жасалып, үйден оқыту белгіленген.

Алайда өткен жылдың қазан айында қайта тексерістен өткен кезде өңірлік сараптама комиссиясы баланың мүгедектігін растаудан бас тартқан. Олар бұл шешімді ағза қызметінде тұрақты бұзылыстардың жоқтығымен түсіндірген.

Істі қарау барысында сот сараптама жүргізу кезінде бірқатар процессуалдық талаптардың бұзылғанын анықтады. Атап айтқанда, тексеруге міндетті мамандар — ревматолог, травматолог және ортопед қатыспаған. Яғни, комиссия шешімді тиісті бейінді дәрігерлерсіз қабылдаған.

Бірінші сатыдағы сот комиссия шешімін заңсыз деп танып, оның күшін жойды. Ал СҚО сотының әкімшілік істер жөніндегі сот алқасы бұл шешімді қолдап, рәсім талаптарының сақталмауы қорытындының заңдылығына тікелей әсер еткенін атап өтті.

Сот қаулысы заңды күшіне енді.