Қазақстан туын Америкада көкке көтеріп, жеңіспен оралған Закир Найманбаевты ешкім қарсы алмады, деп жазады Alash.KZ.
Осындай таланттарымызды қолдамай құзырлы мекемелер, оның ішінде Абай облысының әкімдігі қайда қарап отыр дейді наразы оқырмандар.
Закирдың көпшілік сұрағына берген өз жауабы мынадай:
«Көп адам маған әкімдік не сыйлағанын сұрап жатыр. Біріншіден, мен сыйлыққа мұқтаж емеспін, өз еңбегіммен тапқаным маған жетеді. Мүмкін, менің жетістігім Қазақстан үшін соншалықты жарқын және әсерлі болмаған шығар. Бірақ мен Қазақстанды, өз елімді дүниежүзіне танытқанына қуаныштымын!
Екіншіден, мен кеше туған қалама ұшып келдім, бірден таксиге отырып, үйге кеттім. Мүмкін, кеше демалыс күні болғандықтан, ешкім қарсы ала алмаған шығар?»,- дейді спортшы.
Закир Найманбаев Америкада Дана Уайттың «Шапалахов» шоуына қатысып, қомақты ақша ұтып алды.
Семейден шыққан атлет, бірнеше мәрте Азия чемпионатының жеңімпазы, дене шынықтыру пәнінің мұғалімі, көптеген рекордтардың авторы Закир Найманбаев туралы қысқа айта кетсек. Ол 13 жасында 110 кг көтеріп, 17 жасында алғаш рет Азия чемпионы атанды.
Ғаламтордан Закирдің мықтылығына тәнті болған Дана Уайт оны Power Slap – шапалақпен ұру жарысына шақырды. Бұл жарыс соңғы уақытта өте танымал болуда.
Найманбаев бұл додада дебют жасап қана қойған жоқ, ол қарсыласын бірден нокаутқа жіберіп, 10 000 доллар бонус ұтып алды. Желідегі оқырмандар "шапалақ батырға" сәттілік тілейміз деп жазып жатыр.
