Ekaraganda.kz ақпараттық агенттігінің редакциясына жазылушылар Қарағандының орталық көшелерінің бірінде болған жол-көлік оқиғасының видеосын жіберді, деп хабарлайды Alash.kz.
Қарағанды облысы полиция департаментінің мәліметінше, 6 қаңтар күні Гоголь мен Лобода көшелерінің қиылысында Kia және Lada маркалы екі көлік қатысқан жол-көлік оқиғасы орын алған.
Видеода шетелдік көліктің (Kia) алдыңғы оң жақ дөңгелегі жоқ екені, қауіпсіздік жастықшалары іске қосылғаны көрінеді. Ал Lada маркалы көліктің алдыңғы бөлігі қатты зақымдалып, алдыңғы әйнегі сынған.
Апат салдарынан Lada көлігінің 22 жастағы жүргізушісі мен 16 жастағы жолаушысы медициналық мекемеге жеткізілді.
Бұл дерек полицияда тіркелді. Жол-көлік оқиғасының себептері тиісті сараптамалар нәтижесінде анықталады.
Посттың астындағы пікірлерде оқырмандар Kia көлігінің рулінде мәслихат депутаты болғанын және оның сайлаушылармен кездесуге бара жатқанын жазған. Алайда оның аты-жөні хабарланған жоқ.
“Киа көлігінің рулінде депутат отырған. Ол Lada көлігін кесіп өткен. Қатты зардап шеккен қыз – Lada-ның жолаушысы”.
“Бұл көлікте депутат сайлаушылармен кездесуге бара жатқан еді”.
“Кездесуге уақытында бару керек, оны адамдар күтіп отырды… Бірақ ол бармады”.
