Ақтауда тұрғын үйде өрт шығып, жасөспірім көз жұмды, деп жазады Alash.kz ұлттық порталы.
Маңғыстау облыстық ТЖД хабарлауынша, 28-шағынауданнан өрт туралы хабар «112» пультіне 8 желтоқсан күні сағат 09:04-те түскен. Оқиға №21 үйдің төртінші қабатындағы пәтерде болған.
Өрт сөндірушілер шақыру орнына алты минутта жетіп, шамамен 20 шаршы метр аумақты шарпыған өртті 09:28-де толық сөндірген.
«Тілсіз жауды ауыздықтау барысында пәтерден ес-түссіз жатқан кәмелетке толмаған жасөспірім табылды. Ол дереу жедел жәрдем қызметіне тапсырылды. Алайда дәрігерлердің көрсеткен көмегіне қарамастан, бала жедел жәрдем көлігінде көз жұмды», – делінген хабарламада.
Үй тұрғындарын эвакуациялау қажеттілігі болмаған. Өрттің шығу себебі анықталып жатыр, қаза тапқан баланың жасы нақтылануда.
