Шымкентте тиісті біліктілігі мен медициналық лицензиясы жоқ азаматқа қатысты сот үкімі шықты. Ол әйел адамға заңсыз пластикалық операция жасап, соның салдарынан пациент бір көзінің көру қабілетінен толық айырылған, деп жазады Alash.KZ Шымкент прокуратурасының баспасөз қызметіне сілтеме жасап.
Прокуратураның мәліметінше, сотталған азамат әйелге блефаропластика операциясын жасаған. Алайда оның аталған медициналық қызметті көрсетуге қажетті маман сертификаты мен тиісті лицензиясы болмаған.
Отадан кейін пациенттің бір көзінің көру қабілеті толықтай жоғалған.
Блефаропластика дегеніміз не?
Блефаропластика – қабақ аймағына жасалатын пластикалық хирургиялық операция. Оның барысында жоғарғы немесе төменгі қабақтағы артық тері алынып, қажет болған жағдайда май тіндері мен бұлшықеттің белгілі бір бөлігіне хирургиялық түзету жасалады. Мұндай процедура косметикалық мақсатта да, медициналық көрсеткіштер негізінде де жүргізілуі мүмкін.
Сот ер адамды Қазақстан Республикасы Қылмыстық кодексінің 322-бабының 2-бөлігі бойынша кінәлі деп таныды.
Сот шешімімен оған 1 жыл 6 айға бас бостандығынан айыру жазасы тағайындалды. Сонымен қатар сотталған азаматқа үш жыл мерзімге медициналық және фармацевтикалық қызметпен айналысуға тыйым салынды.
Осыған байланысты Шымкент прокуратурасы азаматтарды медициналық қызмет көрсететін маманды таңдауда мұқият болуға шақырды.
«Тиісті лицензиясы мен біліктілігі жоқ тұлғалардың көмегіне жүгіну өмір мен денсаулық үшін ауыр зардаптарға әкеп соғуы мүмкін», – деп ескертті прокуратура.
