Kazinform мәліметінше, оқиға 10 қазанда әнші Қайрат Нұртастың шығармашылық қызметінің мерейтойына арналған «Сахнада 20 жыл» концертіне көрермендер кіріп жатқан кезде болған. Әлеуметтік желілерде стадионға кіреберісте адамдардың шамадан тыс көп жиналғаны туралы ақпарат тарады.
Шымкент қалалық Полиция департаментінің мәліметінше, концерт кезінде қауіпсіздік талаптарына сай келмейтін қызмет көрсету фактісі бойынша қылмыстық іс тіркелді.
– Адамдардың көп жиналуына байланысты бір адам зардап шекті. Іс-шараны ұйымдастырушылар полицияға жеткізілді. Қазіргі уақытта сотқа дейінгі тергеп-тексеру жүргізіліп, болған жағдайдың барлық мән-жайы анықталып жатыр, – делінген полиция хабарламасында.
Тергеу қорытындысы бойынша ұйымдастырушылардың әрекеттеріне құқықтық баға беріліп, тиісті процестік шешім қабылданады.
Шымкент қаласының Денсаулық сақтау басқармасының хабарлауынша, концерт кезінде медициналық көмекке жүгінген 8 адамның жетеуі тексеруден кейін үйіне жіберілген.
– Ал 18 жастағы қыз ауруханаға жеткізіліп, оған қажетті медициналық көмек көрсетіліп жатыр. Қазіргі уақытта оның жағдайы дәрігерлердің бақылауында, – деп мәлімдеді ведомство.
