Түркістан қаласында қызметтік міндетін атқару барысында сұмдық жол-көлік оқиғасы болып, қалалық полиция басқармасы патрульдік полиция батальонының аға инспекторы, полиция капитаны Бауыржан Қонысбеков қаза тапты, деп хабарлайды Alash.kz.
Әлеуметтік желілерде тараған кадрлардан екі бірдей полиция автокөлігінің қатты зақымдалғанын және олардың бірінің жол жиегіндегі бағанаға соғылғанын көруге болады. Осы бейнежазбаларға сүйенген куәгерлердің пайымдауынша, апат салдарынан кем дегенде екі тәртіп сақшысы түрлі деңгейде зардап шеккен, ал екінші қызметкердің қазіргі жағдайы әзірге беймәлім болып отыр. Оқиғаға қатысты интернет қолданушылары арасында сан түрлі болжамдар мен нұсқалар желдей есіп жатқандықтан, бұл жайтқа Қазақстан Республикасының Ішкі істер министрі арнайы пікір білдіріп, ресми түсініктеме берді. Бейнебаянның сипаттама бөлігінде апатқа қатысқан екінші көліктің шамамен сағатына 180 шақырымдық аса жоғары жылдамдықпен қозғалғаны туралы мәлімет жазылған. Сонымен қатар, желі қолданушылары арасында дәл осы сәтте қызметтік көлікті тізгіндеген жүргізушінің Тараз көшесінің бойында тыйым салынған бұрылыс жасап, жол қозғалысы ережесін өзі бұзғаны жайында да ақпараттар тарап жатыр. Осы ретте ведомство басшылығы қаза тапқан қызметкердің отбасына заң аясында қажетті барлық көмек пен әлеуметтік қолдаудың толықтай көрсетілетінін ресми түрде жеткізді.
Министр Ержан Сәденов қайғылы апатқа байланысты қаза тапқан қызметкердің туған-туыстарына демеу болып, келесідей мәлімдеме жасады:
«Қызметтік міндеттерін атқару кезінде қаза тапқан Түркістан қаласы полиция басқармасы патрульдік полиция батальонының аға инспекторы полиция капитаны Бауыржан Қонысбековтің туған-туыстары мен жақындарына көңіл айтамын. Ішкі істер министрлігі марқұмның отбасына жан-жақты қолдау көрсетеді».
