Маңғыстау облысының Мұнайлы ауданында отбасылық басқосудан соң ботулизмнің ауыр түрін жұқтырған төрт тұрғын, соның ішінде екі бала жансақтау бөлімінде өкпені жасанды желдету (ӨЖЖ) аппаратына қосылып, аса ауыр жағдайда жатыр, деп хабарлайды Alash.kz.
Оқыс оқиға 17 қыркүйекте орын алған. Тұрғындар тоңазытқышта ұзақ уақыт бойы сақталған үйде салқын ысталған балықты тұтынған. Келесі күні-ақ дерттің алғашқы белгілері, яғни жүрек айну, құсу, тамақтың құрғауы, көру мен жұтынудың бұзылуы, көздің қосарлануы мен сананың тұмандануы байқалды. 19 қыркүйекте науқастар шұғыл түрде емдеу мекемелеріне жеткізілді: үш ересек адам облыстық көпсалалы ауруханаға, ал 9 жасар Бекарыс Қанатпаев облыстық балалар ауруханасына жатқызылды. Бүгінде әлеуметтік желіде 9 жасар Бекарыстың туыстары өңір басшысы Нұрдаулет Қилыбайға арнайы бейнеүндеу жолдап, ақша сұрамайтындарын, тек елордалық білікті реаниматологтар мен инфекционистерді жедел Ақтауға жіберуді немесе балаларды санитарлық авиациямен Астанаға тасымалдауды талап етті. Себебі төрт күн бойы емдеу шаралары жүргізілгенімен, оң динамика байқалмаған. Сонымен қатар зардап шеккендердің жақындары клиникаға дәл осындай симптомдармен тағы бір 5 жасар баланың түскенін хабарлады.
«Бұған дейін бізге Астанадан онлайн-консультация жүргізіліп жатқанын айтты. Бұл онлайн форматқа біз келіспейміз! Біз республикалық деңгейдегі мамандардың — реаниматологтар мен инфекционистердің — Ақтауға жеке өзі келуін немесе баланы жоғары деңгейдегі көмек көрсетілетін жерге санитарлық авиациямен шұғыл тасымалдауын сұраймыз. Уақыт жоғалтуға болмайды!» — дейді зардап шеккендердің жақындары.
Маңғыстау облыстық Денсаулық сақтау басқармасы науқастарға ботулизм күдігі диагнозы қойылғанын растады. Ведомствоның бас штаттан тыс эпидемиологі Марал Қадырдың сөзінше, қазіргі уақытта пациенттерге кешенді дезинтоксикациялық әрі симптоматикалық терапия жүргізіліп, арнайы ботулизмге қарсы сарысу енгізілген. Осы орайда жауапты мекеме тұрғындарға үйде тез бұзылатын тағамдарды әзірлеу мен сақтауда қауіпсіздік талаптарын қатаң сақтауды және уланудың алғашқы белгілері байқалған бойда дәрігерге жүгінуді ескертеді.
