Павлодарда екі жасөспірім 7 жасар мектеп оқушысының тілін қайшымен кесуге әрекет жасады, деп хабарлайды Alash.kz .
Баланың анасының айтуынша, балалар оны жерге құлатып, денесіне және басына бірнеше соққы берген, содан кейін тілін жарақаттаған.
Қазіргі таңда зардап шеккен бала травматология бөлімінде ем қабылдап жатыр. Облыстық балалар ауруханасының мәліметінше, алғашқы тексеру кезінде ми шайқалуы, жоғарғы және төменгі еріндердегі сызаттар мен көгерулер, тіл ұшындағы жарақат және сөйлеу қабілетінде бұзылу анықталған.
Павлодар облыстық полициясы бұл факті бойынша «қасақана жеңіл дене зақым келтіру» бабы бойынша қылмыстық іс қозғалғанын растады. Полиция заңды өкілдердің іс-әрекеттеріне құқықтық баға берілетінін хабарлады. Сондай-ақ кәмелетке толмағандардың әрекеті Кәмелетке толмағандар істері және олардың құқықтарын қорғау комиссиясында қаралып, есепке алынатын болады.
Балалардың құқықтарын қорғау уәкілі Сауле Шакенева зардап шеккен балаға аурухана психологы жұмыс істеп жатқанын айтты. Тергеу барысында оқиғаның барлық мән-жайы мен себептері анықталады.
