Шымкентте М.Әуезов атындағы Оңтүстік Қазақстан университетінің ректоры 28,5 миллион теңге пара алды деген күдікпен ұсталды, - деп хабарлайды Alash.KZ Otyrar.kz-ке сілтеме жасап.
Бұл ақпарат әлеуметтік желіде тараған. Ондағы ақпаратқа сәйкес, ректордан бөлек оқу орнындағы тағы екі адам мен екі компания басшысы ұсталған.
Экономикалық тергеу департаменті ректордың ұсталғаны туралы ақпаратты растаған. Қазіргі уақытта тергеу амалдары жүргізіліп жатыр.
Ведомство басшысының айтуынша, тергеудің құпиялылығына байланысты ақпарат жария етілмейді. Істің мемлекеттік сатып алуға қатысты екені ғана белгілі.
Айта кетейік, бұған дейін Жамбыл политехникалық жоғары колледжінің директоры Дүйсенбек Әбдірайымов пара алып жатқан жерінде ұсталған болатын.
Бұл туралы Orda.kz дереккөздері хабарлаған. Антикорда әзірге бұл жайлы ресми ақпарат жоқ.
Колледж директоры пара ретінде нақты қанша алғаны белгісіз. Әбдірайымов ақшаны колледжде грант беру үшін алған.
Дүйсенбек Әбдірайымов 63 жаста. Алты жыл бойы облыстық білім басқармасын басқарды. Кейін Жамбыл политехникалық колледжін басқарды. 1998 жылдан 2004 жылға дейін жұмыс істегенде Әбдірайымовтар отбасы екі жатақхана ғимаратын жекешелендірді. Соның негізінде политехникум бастығының екі қызы колледж ашты.
Еске салайық, биыл жоғары оқу орындарындағы мемлекеттік грантқа қатысты шу болған еді. Бірнеше түлек су басқан өңірлер үшін бөлінген квотаның кесірінен жоғары балл жинаса да мемлекеттік грантқа ілікпей қалған. Талапкерлер Ғылым және жоғары білім министрлігін сотқа берді.
Бұл туралы белгілі құқық қорғаушы Халида Әжіғұлова әлеуметтік желідегі парақшасында жазды.
Әжіғұлованың айтуынша, кеше алғашқы талапкер Ғылым министрлігіне қарсы әкімшілік арыз түсірген.
«Өкінішке қарай, министрлік өз қателігін әлі мойындамай отыр, заңнаманы бұзып ТЖ квотасын рұқсатсыз енгізуге құқылымыз деп санайды. Бірақ министрлік өз күшімен жеңіп тұрған гранттарынан заңсыз айырылған талапкерлерді үнемі көзге ілмей жүре бере алмайды. Грант үшін жылдар бойы еңбек еткен балалардың құқығын шектеп, тасқыннан зардап шеккен басқа балаларға көмектесуге болмайды. Басқаның есебінен қайырымдылық жасауға болмайды», - деп жазды құқық қорғаушы.
Әжіғұлованың сөзінше, университеттер жоғары балл алғанына қарамастан кейбір балаларға ішкі гранттарды беруден бас тартқан. Ал отбасылардың оларды оқытуға ақшасы жоқ.
