Астанада Мәңгілік Ел даңғылында бойжеткенді көлікпен қағып, оқиға орнынан қашып кеткен жүргізуші ұсталды, деп хабарлайды Alash.kz.
Жол-көлік оқиғасы 28 қыркүйек күні сағат 11:26-да орын алған. Әлеуметтік желілерде тараған бейнежазбадан Jetour маркалы автокөліктің қызды қағып кетіп, тоқтамастан әрі қарай жүріп кеткенін көруге болады. Кадрлар қайғылы жағдайға куә болған өзге көліктің бейнетіркегішіне түсіп қалған.
Жедел іздестіру шараларының нәтижесінде полиция қызметкерлері Jetour T2 көлігінің жүргізушісін ұстады. Тәртіп бұзған азаматтың көлігі коммуналдық тұраққа қойылды. Қазіргі уақытта осы факті бойынша тиісті тексеру жұмыстары жүргізіліп жатыр.
