Әлеуметтік желі қолданушылары қазақ тілін талап еткен қызметкерін жұмыстан қуған компания наразы болып, жаппай байкот жариялап жатыр, деп хабарлайды Alash.KZ ұлттық порталы.
Malim.kz порталы жағдайды егжей-тегжейлі баяндады.
Бәрі қалай басталды?
Асылхан есімді азамат Magnum сауда желісі арқылы азық-түлікке тапсырыс беріп, оны жеткізген курьермен тілдескен. Тілдесу барысында курьердің қазақша сөйлеуін талап еткенін желіге жазған. Жазбаны оқыған компания басшылығы ешқандай ескеру берместен, ашық талқыламастан, қызметкерді бірден жұмыстан шығарып жіберген.
Мен шағым түсірмедім. Бірақ постымды оқып, курьерді жұмыстан шығарыпты. Енді қайта кіре алмайтын болған, - деп ақталды желі қолданушысы.
Осыдан кейін Facebook әлеуметтік парақшасында резонанс басталды. Руслан Түсіпбеков есімді белсенді бұл мемлекеттік тілге жасалған қастандық екенін айтады.
Бір қазақ екінші қазақты қазақша сөйле деп ренжітті. Соңғысы жұмыстан қуылды. Біріншісі өкінетін сияқты, бірақ Magnum компаниясының логистикалық директорының өзі хабарласып, мәселені шешкеніне өте қуанышты.Міне, Тәуелсіздіктің 34-ші жылында Ұлы далада болып жатқан жайттар осындай. Мысалы, Ресейдегі жағдайды елестетіп көріңіз. Ресейде орыс тілінде сөйлеуді сұраған курьерді жұмыстан шығару – қоғамда үлкен резонанс туғызар еді. Бұл жағдайда Ресейде, ресми тіл — орыс тілі болғандықтан, қызметкерлердің ресми тілде сөйлесуге құқығы бар деп саналады. Мемлекеттік тілде сөйлесуді талап еткен қызметкерді еш жерде жұмыстан шығаруға жол берілмейді. Бізге оңай! Осыдан кейін бізді кім сыйлайды?- дейді Руслан Түсіпбеков.
Бұл постқа Magnum өкілі жауап беріп, конституцияда орыс тілі мемлекеттік тілмен тең қолданылатынын алға тартты.
Біз өз жұмысымызда Қазақстан Республикасының заңнамасын басшылыққа аламыз. Мемлекетіміздің Конституциясына сәйкес: «Мемлекеттік ұйымдарда, жергілікті өзін-өзі басқару органдарында, және ұйымдарда орыс тілі ресми түрде қазақ тілімен тең қолданылады». Біз адамдарды ұлтына қарай бөлмейміз және барлық сатып алушыларымызға бірдей қамқорлық жасаймыз. Біз жұмысымыз барысында сатып алушыларды тәрбиелемеуіміз және оларға мәдени немесе басқа да дүниетанымдық талаптар қоймауымыз керек. Сондықтан біз қызметкерімізді сөйлесу тілі үшін емес, сатып алушымен қарым-қатынас жасау мәнері, жұмыс орнындағы лауазымды асыра сілтеп пайдаланғаны үшін жұмыстан босаттық, - дейді компания өкілі.
Ал желі қолданушылары, белсенді азаматтар "қазақтың нанын, суын ішіп отырып, қазақ тілін құрметтемейтін Magnum-ның құны біз үшін көк тиын", - деп наразылық білдіріп жатыр.
