"ОПГ құрған" - қырғыздар қылмыс әлемінің серкесі Камчы Көлбаевтың қазақстандық серіктесіне іздеу жариялады

Қазақстандық бизнесмен қырғызстандық Камчы Көлбаевтың қылмыстық тобына қатысы бар болуы мүмкін, деп жазады Alash.KZ.

Қырғызстанның ҰҚМК Қарағанды облыстық бокс федерациясының президенті Камалутин Халиковқа халықаралық іздеу жариялады. Ол қылмыс әлемінің серкесі, «заңдағы ұры» Камчы Көлбаевтың (Асанбек) ұйымдасқан қылмыстық тобына қаржылай қолдау көрсетті деп айыпталып жатыр.

Қырғыз арнайы қызметінің хабарлауынша, Халиков бұған дейін Қазақстанда ОПГ құру дерегі бойынша жауапқа тартылған. Сондай-ақ, ол қырғыз-қазақ шекарасы арқылы тауарларды контрабандалық жолмен тасымалдаумен айналысқан.

«К.Асанбектің жүйелі түрде рэкет, қорқытып ақша алу, кәсіпкерлерден заңсыз салық жинау сияқты қылмыстық әрекеттерге қатысқанын, сондай-ақ оның «кісі өлтіру», «адам ұрлау», «қылмыстық қауымдастық ұйымдастыру» баптары бойынша бірнеше рет сотталғанын біле тұра, Камалутин Халиков Қырғызстанда бірлескен бизнес-жобаларды жүзеге асыру үшін одан қолдау іздеп, байланыс орнатқан», - делінген ҰҚМК мәлімдемесінде.

Халиковқа қатысты сырттай қамауға алу бұлтартпау шарасы қолданылды. Ол қазір іздеуде жүр.