Нұржан Әлтаевты Жезқазған түрмесіне неге ауыстырды?

Семейдегі №19 түрмеде отырған мәжілістің бұрынғы депутаты, "Ел тірегі" партиясын құру жөніндегі бастамашы топ жетекшісі Нұржан Әлтаевты Жезқазғандағы түрмеге этаппен әкетті, деп жазады Alash.KZ.

Қылмыстық атқару жүйесі комитеті белсендінің әйеліне жіберген хатта осылай деп хабарлаған.

"Аса ірі мөлшерде пара алғаны үшін" ұзақ жылға сотталып, жазасын өтеп жатқан Әлтаев не себепті басқа түрмеге ауыстырылғаны белгісіз. Комитет "Азаттықтың" сауалына әлі жауап бермепті. 

"Ел тірегі" партиясын құру жөніндегі бастамашы топ заңгері Нұрсұлтан Ермахановтың айтуынша, Әлтаевты этаппен алып кететіні жақындарына алдын ала ескертілмеген.

ҚАЖК Әлтаевтың әйеліне қазір оның Қарағанды облысындағы №61 мекемеде екенін, ары қарай этаппен Жезқазғандағы №62 мекемеге әкететінін жеткізген.