НАТО-ның Бас хатшысы Марк Рютте жуырда Ресей Сыртқы істер министрі Сергей Лавров туралы кекесін пікір айтты, деп хабарлайды Alash.KZ.
Ол: “Лавров Иса Мәсіх дүниеге келгеннен бері Сыртқы істер министрі болып келе жатыр, бірақ оның аузынан пайдалы сөз шыққанын көрмедім”, – деді. Бұл сөз саясаттағы дипломатиялық тілден гөрі өткір мысқылға ұқсайды.
Лавровтың мансабы шынында да таңғаларлықтай ұзаққа созылды. Қазір ол 75 жаста. 2004 жылдан бері Ресейдің сыртқы саясатын басқарып келеді. Осы уақыт ішінде Кремльде сегіз бірдей премьер-министр ауысты, Путин мен Медведев бірнеше мәрте президенттік пен үкімет тізгінін алмастырып отырды. Ал Лавров сол күйі өз орнында қалып, Мәскеудің халықаралық мінбердегі басты “үні” болып қала берді.
Лавровтың дипломат ретіндегі тәжірибесі 1970 жылдардан бастау алады. Кеңес дәуірінде БҰҰ жанындағы өкілдікте қызмет атқарып, халықаралық сахнада шыңдалды. Оның қатал мінезі мен өткір сөзі Мәскеудің сыртқы саясаттағы “қатал ұстанымын” танытып келеді. Алайда сыншылар Лавровты қазіргі заманғы халықаралық қатынастарда диалог құрушы емес, қақтығысты ушықтырушы ретінде сипаттайды.
Соңғы жылдары оның аты Украинадағы соғысқа байланысты жиі аталды. Лавров Батыс елдерінің саясатын айыптап, Мәскеудің әрекеттерін қорғап келеді. Дегенмен, оның дипломатиялық риторикасы халықаралық аренада жиі сынға ұшырайды. НАТО Бас хатшысының әзілі де осы сынның бір көрінісі іспеттес.
Батыс саясаткерлері үшін Лавров — өзгермейтін фигура. Ол ондаған жыл бойы әлемдік саммиттер мен келіссөздерде бір сарынды ұстанымын қайталап келе жатыр. Сондықтан Рюттенің “пайдалы сөз шыққан жоқ” деген пікірі тек кекесін емес, сонымен бірге Ресей дипломатиясының қазіргі жағдайына берілген саяси баға деп қабылдауға болады.
Сергей Лавровтың ұзақ қызметі Ресей саясатының бір ерекшелігін де көрсетеді. Кремльде тұлғалардың жиі ауысуы сирек, әсіресе стратегиялық бағыттарда. Лавровтың 20 жылдан астам уақыт бойы Сыртқы істер министрі болып отыруы Ресейдің саяси жүйесінің тұрақсыздық емес, керісінше, жабық әрі өзгеріссіз сипатын аңғартады.
