Иранның БҰҰ жанындағы тұрақты өкілі Әмір Саид Иравани БҰҰ Бас хатшысы Антониу Гутерришке және Қауіпсіздік кеңесінің төрағасына хат жолдап, АҚШ президенті Дональд Трамптың Тегеранға қатысты «заңсыз қоқан-лоққыларын» айыптауға шақырды, деп хабарлайды Alash.kz.
Al Jazeera мәліметінше, хат Дональд Трамптың Ирандағы жалғасып жатқан наразылықтар кезінде шерушілер қаза тапқан жағдайда АҚШ «соғысқа дайын» екенін мәлімдегенінен кейін бірнеше сағат өткен соң жолданған.
Әмір Саид Иравани БҰҰ басшылығы мен Қауіпсіздік кеңесі мүшелерін Трамптың «ойланбай айтылған әрі арандатушылық сипаттағы мәлімдемелерін» қатаң әрі сөзсіз айыптауға үндеді. Ол бұл мәлімдемелерді БҰҰ Жарғысы мен халықаралық құқықтың өрескел бұзылуы деп бағалады.
«Сыртқы қысым немесе әскери интервенцияны сылтау етіп, ішкі тәртіпсіздіктерді қоздыруға, қолдауға немесе заңдастыруға бағытталған кез келген әрекет Иран Ислам Республикасының егемендігіне, саяси тәуелсіздігіне және аумақтық тұтастығына ауыр нұқсан келтіреді», – делінген хатта.
Сондай-ақ Иравани Иран үкіметі өзінің егемендігін қорғауға деген ажырамас құқығын растайтынын және бұл құқықты «батыл әрі шамалы түрде» жүзеге асыратынын атап өткен.
«АҚШ осы заңсыз қоқан-лоққылардан және кейінгі кез келген шиеленістен туындайтын салдардың толық жауапкершілігін өз мойнына алады», – деп қосты Иранның БҰҰ-дағы өкілі.
Еске салайық, Иранда наразылық акциялары бірнеше күннен бері жалғасып келеді. Олар негізінен ұлттық валютаның күрт құнсыздануы мен бағаның өсуіне байланысты туындаған. Ел билігі диалогқа дайын екенін мәлімдегенімен, сыртқы қысым мен ішкі іске араласуға жол берілмейтінін қадап айтты.
