Украина президенті Владимир Зеленский жаңа жыл қарсаңындағы бейнеүндеуінде украин халқының басты арманы – бейбіт өмір екенін мәлімдеді, деп жазады Alash.KZ.
Оның айтуынша, Украина халқы бейбітшілік үшін күресіп қана қоймай, оған қол жеткізу жолында барын салуда.
Мемлекет басшысының бейнеүндеуі 31 желтоқсанда оның Facebook парақшасында жарияланды.
«Бірнеше минуттан кейін жаңа жыл басталады. Осы үндеуде “бірнеше минуттан соң бейбітшілік те орнайды” деп айту үшін мен бәрін, өмірдегі бар нәрсені беруге дайын болар едім. Өкінішке қарай, әзірге мен мұны айта алмаймын. Бірақ ар-ұятымның алдында таза күйде айта аламын: Украина бейбітшілік үшін қолдан келгеннің бәрін жасап жатыр. Және бұл жолдан таймайды», – деді Зеленский.
Президенттің сөзінше, қазіргі таңда бейбіт келісімнің 90 пайызы дайын.
«Қалғаны – 10 пайыз. Бірақ бұл жай ғана сан емес. Бұл – бейбітшіліктің тағдырын, Украинаның және тұтас Еуропаның болашағын айқындайтын шешуші 10 пайыз. Бұл – миллиондаған адамның өмірін сақтап қалуға қажет 10 пайыздық батылдық, бірлік пен даналық. Украинаның, Американың, Еуропаның, бүкіл әлемнің даналығы. Бұл – бейбітшілікке жету үшін жетіспей тұрған соңғы 10 пайыз», – деп атап өтті ол.
Зеленский Украина бейбітшілікті қалайтынын, алайда ол кез келген бағаға қол жеткізілмеуі тиіс екенін қадап айтты.
«Біз соғыстың аяқталғанын қалаймыз, бірақ Украинаның жойылғанын қаламаймыз. Біз шаршадық па? Әрине, қатты шаршадық. Бірақ бұл біз берілуге дайынбыз деген сөз емес. Олай ойлайтындар қатты қателеседі. Олар осы жылдар бойы украин халқының кім екенін түсінбеген. Біз – 1407 күн бойы толық ауқымды соғысқа төтеп беріп келе жатқан халықпыз», – деді мемлекет басшысы.
Ол Ресейдің соғысты өз еркімен тоқтатпайтынын, тек сыртқы қысым мен мәжбүрлеу ғана оны бейбітшілікке итермелейтінін айтты. Мұндай әрекеттерді Ресей билігі «ізгі ниет қадамы» деп атауға дағдыланғанын атап өтті.
Президент Украина үшін қауіпсіздік кепілдіктерінің АҚШ Конгресі тарапынан ратификациялануы аса маңызды екенін жеткізді.
«Будапешт меморандумы сияқты бос уәделер Украинаға керек емес. Минск келісімдері секілді әдемі жазылған тұзақ та қажет емес. Әлсіз келісімдерге қойылған қол соғысты одан әрі ушықтырады. Менің қолтаңбам тек мықты, әділ келісімнің астында тұрады. Қазір әрбір кездесу, әрбір қоңырау, әрбір шешім – соған бағытталған. Бізге бір күндік немесе бірнеше айлық емес, жылдарға жететін берік бейбітшілік керек», – деді Зеленский.
Оның айтуынша, Украинада даналық та, қадір-қасиет те, ымыраға келу қабілеті де бар, бірақ ар-намыстан аттау жоқ.
«Бүгін екі-ақ жол бар: не бейбітшілік Ресейдің соғысын тоқтатады, не Ресей бүкіл әлемді өз соғысының ішіне тартады», – деп түйіндеді ол.
Зеленский Украинаны қазіргі таңда Еуропаның тыныш өмірі мен «орыс әлемінің» арасындағы жалғыз қалқан деп атады. Оның айтуынша, көптеген еуропалық көшбасшылар үшін Украинаны қолдаудың себебі айқын.
«Егер, Құдай сақтасын, Украина құласа, келесі сұрақтар туындайды: Польшаны не үшін қорғау керек? Балтық елдері үшін кім соғысады? Украинасыз НАТО не істейді? Украина Еуропаға керек, Еуропа Украинаға керек. Біз мұны бұрынғыдан да анық сезініп отырмыз», – деді ол.
Президент бейбіт келісім украин халқының қолдауына ие болуы тиіс екенін, ал бейбітшілік лайықты әрі әділетті болуы керектігін баса айтты.
«Ресей соғысты тоқтатуға соғысуға қарағанда бір себепке артық тапқан сәтте ғана мәжбүр болады. Сол себепті біз майдандағы сарбаздарымыздың сөзін жиі қайталаймыз: бізге тек олардан бір күн ұзақ шыдау керек. Бүгін соған мынаны қосамыз: бір қадам алда болу, бір сағат ертерек қимылдау, бір шешімге батылырақ бару… және 10 пайызға мықты болу. Сонда біз бейбітшілікке 100 пайыз қол жеткіземіз», – деп қорытындылады Владимир Зеленский.
