Көпқабатты үйлерде түнгі уақытта қатты музыка қосу, жөндеу жұмыстарын жүргізу немесе басқа жолмен тұрғындардың тыныштығын бұзу әкімшілік жауапкершілікке әкелуі мүмкін, деп жазды Alash.kz.
Әкімшілік құқық бұзушылық туралы кодекстің 437-бабына сәйкес, жеке тұлғалардың қалыпты демалысы мен тыныштығына кедергі келтіретін шуға сағат 22:00-ден таңғы 09:00-ге дейін жол берілмейді.
Талапты бұзған жеке тұлғаға 5 АЕК – 21 625 теңге айыппұл салынады. Бір жыл ішінде құқық бұзушылық қайталанса, айыппұл 10 АЕК-ке, яғни 43 250 теңгеге дейін өседі.
Ал тұрғын үйлерде немесе тұрғын үй аумағында орналасқан ойын-сауық орындары үшін тыныштық уақыты бөлек белгіленген: жұмыс күндері – 22:00-ден 09:00-ге дейін, демалыс және мереке күндері – 23:00-ден 10:00-ге дейін.
Егер көршілер белгіленген уақытта тыныштықты бұзса, тұрғындар полицияға 102 нөмірі арқылы хабарласа алады.
