Ақтөбеде бір тәуліктен бері хабарсыз кеткен ерлі-зайыптының мәйіттері бүгін қала шетінен табылды, деп хабарлайды Alash.KZ.
40 жастағы Аманжол Алмағанбетов пен оның жұбайы Гүлжахан Шектібаева 41-разьездегі үйлерінен шыққан соң жоғалып кеткені туралы ақпарат кеше тараған болатын.
Облыстық полиция департаментінің мәліметінше, табылған әйел адамның денесінде зорлық-зомбылық белгілері анықталған. Осы дерек бойынша қылмыстық іс қозғалды.
Іздеу жұмыстарын жалғастыру барысында ер адамның денесі жеке аумақтан асулы күйінде табылған.
- Қазіргі уақытта оқиға орнында жедел-тергеу тобы жұмыс істеп жатыр. Қажетті процестік әрекеттер жүргізіліп, аумақ тексерілуде. Барлық заттай дәлелдемелер жинақталып жатыр. Сондай-ақ тиісті сот-медициналық сараптамалар тағайындалды, - деп хабарлады облыстық ПД баспасөз қызметі.
Тергеу амалдары жалғасуда. Оқиғаның мән-жайы мен себептері сот-медициналық сараптамалардың қорытындысынан кейін анықталатын болады.
