Сыбайлас жемқорлыққа қарсы іс-қимыл агенттігі жол құрылысы саласында көптеген заң бұзушылықтар анықталғанын хабарлады. Бұл туралы Alash.kz ұлттық порталы мәлімдейді.
Агенттіктің хабарлауынша, соңғы 3,5 жыл ішінде 65 сыбайлас жемқорлық құқық бұзушылық тіркелген, олардың шығыны шамамен 9 млрд теңгені құраған.
Ел бойынша 2 трлн теңгеден астам қаржы бөлінген 217 учаске қамтылғаны атап өтілді.
«Агенттіктің ерекше бақылауында 12 ірі жоба бар. Әр жобаға жауапты тұлғалар бекітілген, олар жергілікті жерлерде жұмысты үйлестіреді. Барлық аймақтарда мониторингтік топтар құрылып, оған қоғам белсенділері мен осы саладағы сарапшылар кірді», - делінген хабарламада.
Антикор қызметкерлері жол саласындағы сыбайлас жемқорлық тәуекелдеріне сыртқы талдау жүргізе бастады. Осы жұмыс барысында 5 аймақта сметаларды артық және қайталанатын жұмыстарды қосу арқылы 4,8 млрд теңгеге көтеру анықталды, ал 6 аймақта жоспарлау тиімді жүргізілмеген.
«Мысалы, Абай облысында 20 млн теңгеге шұңқырларды жөндеу жүргізілгеннен кейін, сол учаскеде 1 млрд теңгеге ағымдағы жөндеу жұмыстары жүргізілуде», - делінген хабарламада.
Сонымен қатар, 4 аймақта 526 заң бұзушылық анықталған.
