Украина Президенті Владимир Зеленский Дональд Трамппен қайта келіссөздер жүргізуге дайын екенін мәлімдеп, бейбітшілікке қол жеткізудің нақты жоспарын ұсынды. Бұл туралы ол 4 наурызда Х әлеуметтік желісінде жазды, деп хабарлайды Alash.kz.
Зеленский Украинаның қақтығысты барынша тез реттеуге ұмтылатынын және АҚШ-пен ынтымақтастыққа дайын екенін атап өтті.
“Украиналықтардан артық бейбітшілікті ешкім қаламайды. Біз президент Трамптың мықты басшылығының аясында тұрақты бейбітшілікке жету үшін жұмыс істеуге дайынбыз”, – деп жазды ол.
Украина президенті бейбітшілік келісіміне жету үшін алғашқы қадамдарды да атады. Олар:
• әскери тұтқындарды босату,
• энергетикалық және азаматтық инфрақұрылымға шабуылдарды тоқтату,
• алыс қашықтықтағы зымырандар мен дрондарды қолдануға тыйым салу,
• Қара теңіз аймағында әскери қақтығыстарды дереу тоқтату, егер Ресей де осыған ұқсас шараларға келіссе.
“Біз тез әрі конструктивті жұмыс істеуге дайынбыз және бұл процесті АҚШ қолдайды деп сенеміз”, – деп атап өтті Зеленский.
Сондай-ақ, ол 28 ақпанда Ақ үйде өткен кездесудің күтілген нәтижеге алып келмегенін мойындады. Ол кезде Трамп пен АҚШ вице-президенті Джей Ди Вэнспен өткен келіссөздер барысында тараптар өткір пікірталасқа түскен.
АҚШ-тың бұрынғы президенті Зеленскийді “ Рақымшыл болмады”, “бейбітшілікке ұмтылмайды” деп айыптап, егер Украина оның шарттарын қабылдамаса, келіссөздерден шығатынын ескерткен.
Бұған жауап ретінде Зеленский кездесу уақытынан бұрын кетіп, ресурс мәселелері бойынша келісімге қол қоюдан бас тартқан.
“Өкінішке қарай, осылай болды. Енді жағдайды дұрыстау керек. Біз АҚШ-пен ынтымақтастықтың конструктивті әрі өнімді болғанын қалаймыз”, – деп атап өтті Зеленский.
Ол Украина пайдалы қазбалар мен қауіпсіздік жөніндегі келісімге кез келген уақытта, кез келген форматта қол қоюға дайын екенін де айтты.
