Мысырда 13 жастағы жасөспірім бірден жылдам дайындалатын лапшаның үш қаптамасын су қоспай жегеннен кейін көз жұмды. БАҚ дерегінше, ол мұндай қадамға әлеуметтік желідегі "құрғақ лапша челленджінен" шабыт алып, бәстескен болуы мүмкін, деп хабарлайды Alash.kz.
Алғашында баланың жағдайы қалыпты болған, алайда жарты сағаттан соң денсаулығы күрт нашарлаған: іш құрылысында қатты ауырсыну пайда болып, терлеп, құса бастаған. Дәрігерлер оны аман алып қала алмады. Сараптама нәтижесі өлімнің себебі – көп мөлшерде құрғақ лапша жегеннен туындаған ішек бітелуі екенін көрсетті. Жасөспірім лапшаны сатып алған дүкен тексерілген, зертханалық талдаулар өнімнің сапа стандартына сай екенін растаған. Демек, мәселе улануда емес, оны тұтыну тәсілінде.
Мамандардың айтуынша, соңғы жылдары жасөспірімдер арасында лапшаны құрғақ күйінде шайнау әдетке айналып барады. Көпшілігі үшін бұл чипсы мен сухарикке арзан балама саналады. Мектеп маңында және балалар алаңдарында бос қаптамаларды жиі көруге болады, ал әлеуметтік желілерде мұндай челлендждер миллиондаған қаралым жинайды.
Алайда мұндай "ойын" өте қауіпті: құрғақ лапша асқазанда тез ісіп, ас қорыту жүйесіне ауыр салмақ түсіреді және көп мөлшерде жеген жағдайда ішек бітелуіне әкелуі мүмкін. Бұған қоса, өнімдегі дәм күшейткіштер мен консерванттар ағзаға қосымша зиян тигізеді.
