Қарасай ауданы Тұрар ауылының маңында 30 тамыз күні шыққан өрт салдарынан үш адамның денесі табылды, деп хабарлайды Alash.kz.
Алматы облысы ТЖД мәліметінше, сағат 15:50-де құрғақ шөп жанған. Жалын 30 гектар аумаққа таралып, жалпы көлемі 531 шаршы метрді қамтыған жеті саяжай үйін, алты шаруашылық нысанды, Honda Civic автокөлігін, 132 шаршы метрлік шөп қораны, шаруа қожалығындағы қалқаны және 80 шаршы метрлік тұрғын үйді шарпыған.
Өрт сөндірушілер келген сәтте барлық құрылыс нысаны толықтай отқа оранған болатын.
Тілсіз жаумен күреске Алматы облысы мен Алматы қаласының ТЖД қызметкерлері, жергілікті билік пен орман шаруашылығы мамандарынан құралған 120 адам және 25 техника тартылды.
"Өртті сөндіруге Алматы облысы мен Алматы қаласының ТЖД, жергілікті атқарушы органдар және орман шаруашылығы қызметкерлерінен құралған шамамен 120 адам мен 25 техника жұмылдырылды. Жағдай ТЖМ-нің толық бақылауында. Өрт ошағын жою жұмыстары жалғасып жатыр", – деп хабарлады облыстық төтенше жағдай департаменті.
Ведомство оқиға орнынан үш адамның мәйіті табылғанын растады. Қазіргі уақытта сот-медициналық сараптама тағайындалды.
