Ким Чен Ын Трампты қорқытты: АҚШ-қа жететін зымыранын көрсетті

Пхеньян соңғы екі жылдағы алғашқы әскери шеруін өткізіп, алғаш рет жаңа Hwasong-20 құрлықаралық баллистикалық зымыранын көрсетті, деп жазады Alash.KZ. 

Мемлекеттік KCNA агенттігі бұл зымыранды елдің «ең қуатты стратегиялық ядролық қаруы» деп атады. Әскери сарапшылардың бағалауынша, ол АҚШ аумағындағы кез келген нысанға соққы бере алады.

Шеру Ким Ир Сен алаңында, билеуші Еңбек партиясының 80 жылдығына орай ұйымдастырылды. Бұған Қытай премьер-министрі Ли Цян, Ресей Қауіпсіздік кеңесі төрағасының орынбасары Дмитрий Медведев және Вьетнам Коммунистік партиясының бас хатшысы То Лам келді.

Өз сөзінде Ким Чен Ын сондай-ақ «халықаралық әділеттілік үшін шетелдік майдандарда» соғысып жатқан солтүстік кореялық сарбаздардың «ерлігін» жоғары бағалады. Сарапшылардың пікірінше, Солтүстік Корея Мәскеуге көмектесу мақсатында 10 мыңнан астам әскер жіберген болуы мүмкін.