Газ жоқ: Шымкентте 56 мың көлік газ таппай қаңтарылып тұр

3 шілдеде Шымкентте автогаздың бір литр бағасы 70 теңгеге жетті, деп хабарлайды Alash.kz.

Шілдеге дейін автогаздың бір литрі 64 теңгеге дейін сатылған. Шымкент қаласындағы бірнеше автогаз бекетінде "газ жоқ" деген тақтайша ілініп тұр деп жазды Азаттық.

Шымкенттегі энергетика және инфрақұрылымды дамыту басқармасы Шымкентте газ тапшы екенін растады.

Басқарма дерегінше, қалаға айына 9500 тонна автогаз қажет. Шілдеге бөлінген газ 6 мың тоннаға жетпейді.

Мекеме энергетика министрлігі Шымкент қаласына қосымша 726 тонна қосымша газ бөлгенін, қазір қала қорында 570 тонна автогаз барын айтады.

Басқарма есебінде "қаладағы 167 жанар-жағармай бекетінде автогаз сатылып жатыр" дейді. Бірақ қанша бекетте газ тапшы екенін айтпаған.

Полиция дерегінше, қалада 56 мыңға жуық көлік газбен жүреді.