Биыл қанша ауылды су басады? - Әріновтың жауабы

Биыл Қазақстандағы 1223 елді мекенді су басу қаупі бар, деп жазады Alash.KZ.

Төтенше жағдайлар министрі Шыңғыс Әріновтің айтуынша, Министрлік жергілікті атқарушы билік өкілдерімен бірге тасқынға дайындық жұмыстарын атқаруда.

Оның айтуынша, республикалық және өңірлік бағдарламалар аясында келесі алдын алу шаралары жүзеге асырылып жатыр:

— 576 шақырым қорғаныс бөгеттері мен дамбалар салынып, нығайтылуда;

— 164 шақырым дренаж жүйесі жаңартылып, жөндеуден өткізілуде;

— жолдардың астына 960 су өткізу құрылғысы орнатылып, ауыстырылуда;

— 658 шақырым каналдар мен арықтар тазартылуда;

— 74 өзенде 300 шақырымға жуық арнаны тереңдету және жағалауды бекіту жұмыстары жүргізілуде;

— қалалар мен ауылдарда нөсер және дренаж жүйелері салынып, жөнделіп жатыр.

"Бұл шаралар су тасқыны қаупін азайтып, елді мекендерді табиғи апаттан қорғауға көмектеседі", – деп мәлімдеді Әрінов.