АҚШ-тың экономикалық-cаяси санаттағы ең үлкен қарсыласы саналатын Қытай да тарифке қатысты шектеулерге келгенде аянып қалмады. Трамп бастаған тариф соғысына жедел жауап беріп, бөгесін құрды, деп хабарлайды Alash.KZ ұлттық порталы.
Трамп әдеттегідей ашу шақырып, "мұндай қадамның құны қымбатқа түсерін" ескертіп жатыр.
Бәрі қалай басталды?
Трамп 2 сәуір күні тұтас әлемге қарсы сауда соғысын жариялады. Қытай импортына қатысты шектеулерді үдемелетіп, қосымша 34% баж салығын енгізді.
Бірақ бұл қарардың бір аптадан кейін іске жегілетінін жеткізді. Айтылған уақыт аралығында барлық елдермен келіссөз жүргізіліп, "феноменальды" жеңілдіктер болатынын уәде етті.
Қытай қадамы
Қытай тарапы бірден Трамптың шабуылын айыптап, өзге елдерге үн қатып, әлемдік сауда бостандығын қорғауға шақырды. Ал екі күннен кейін, яғни жұмада, Қытай Қаржы министрлігі де 34% мөлшерінде қосымша баж салығын енгізетінін мәлімдеді.
Қытай, сонымен қатар, Дүниежүзілік сауда ұйымына шағым түсірді. Сарапшылардың сөзіне сенсек, ДСҰ-дағы мұндай даулы процестерді шешу механизмі баяғыда істен шыққан. Оның үстіне АҚШ жағы ұйымдағы апелляциялық органның жұмысын тоқтатып қойған.
Себебі, АҚШ өкілдері ДСҰ-ны айыптап, құзыретін мойындамайды. Қытайы экспансияның негізгі ұйығы деп санайды
"Қытайлықтар оңбай қателесті, [менің шешімімнен кейін] бірден сарсаңға түсті. Олар мүлдем істеуге болмайтынды "істеді"- деп жазды Трамп өзінің әлеуметтік желісінде.
Негізгі нысан
Трамп тариф соғысында ең алдымен Қытайды ақсатуды көздеп отыр. Өйткені Қытай - өз тауарын Америкаға экспорттайтын жетекші ел.
Қазір Қытай мен АҚШ арасындағы сауда-cаттықта саңылау көбейді.
Естеріңізде болса, Трамп бұған дейінгі ел билеген шағында да сауда соғысын ұйымдастырып, негізгі экономикалық және әскери қарсыласымен қақтығысқа түскен.
Сарапшылар екінші қақтығыстың да салдары қатты болатынын айтады.
Мәселен, Жұма күні әлемдегі қор нарықтары күрт төмендеді, облигациялардың кірістілігі өсті және мұнай бағасы қатты түсіп, төрт жыл ішінде ең төменгі деңгейге жетті.
Мұндай "кері кету" үрдістерінің бәрі Қытайдың Трамп тарифтеріне тіл қатуынан кейін басталды. Егер алыптар арасындағы арпалыс тізгінделмесе, сауда соғысы одан ары ушығып, әлемдік экономиканың рецессиясына, атап айтқанда, тұтастай құлдырауына бастауы мүмкін.
Дастан ҚАСТАЙ
