«Бұл қаулының жүзеге асыра отырып, қоғамда суицидтік көңіл-күйді азайтып, қатердің алдын алу шараларын күшейтудің бастауы деп қабылдауға болады. Балаға тәрбиені талбесіктен беру керек. Қазіргі таңда балалар мен ата-ананың арасындағы байланыс алшақтап бара жатқандай әсер етеді. Себебі қоғамынң талабына сай әкесі де шешесі де жұмыс істейді. Күні бойы жұмыста болады, кешкілік уақытта да басқа шаруаға айналып баласының тәрбиесіне баса көңіл бөле алмайтындар да бар. Дей тұрғанмен де педагог маман ретінде балаға қашанда ата-ананың мейірімі мен тәрбиесі аса қажет екенін есімізден шығармасақ екен. Суицидтің алдын алып, қоғамда көбеймеуіне сеп болатын ұлттық тәрбиені ақсатып алмауымыз керек. Мемлекетіміз де жат әдет, жаман қылықтан арылып, ұрпағымыздың салиқалы болып қалыптасуына айрықша көңіл бөліп жатыр», – дейді Алматы қаласындағы №98 бөбекжай-балабақшасының меңгерушісі Мөлдір Ерназарова.
Жоғарыда біз атап өткен қаулыда балалар арасындағы суицид мәселесін азайту мақсатында ата-ана болу мәселесі жеке-дара қарастыру ұсынылған болатын. Ата-аналық құқық пен олардың жауапкершілігіне деген жүктеме де арта түседі. Бірнеше жылды қамтитын кешенді жоспарды жүзеге асыру арқылы біз кәмелет жасына толмаған жасөспірімдер арасындағы суицид мәселесінің азаюына әрі мұндай әрекеттердің орын алмауына күш саламыз. Қаулыдағы ата-аналардың құқығы мен жауапкершілігін күшейтудің маңыздылығы зор. Себебі отбасындағы ата-анасының арасындағы ұрыс, тұрмыстық жанжал басқа да әрекеттер балаларға, әсіресе өтпелі кезеңдегі жасөспірімдердің психологиясына өте қатты соққы болып тиеді. Сондықтан да педагог маман Мөлдір Ерназарованың пікірімен келісе отырып, әрбір ата-ана тәрбие талбесіктен басталатынын жете ұғынуы тиіс демекпіз.
Көшім Есім
