پرەزيدەنت ۆلاديمير زەلەنسكيي ۋكراينانى ەۋروپا وداعىنا (ەو) مۇشە قىلىپ ەنگىزۋ تۋرالى وتىنىشكە قول قويدى. بۇل تۋرالى مەملەكەت باسشىسىنىڭ ءوزى "تەلەگرام-كانالىنا" جازىپ، قول قويۋ كەزى جانە قۇجاتتىڭ سۋرەتىن جاريالادى.
ارىز ەۋروپا كوميسسيانىڭ پرەزيدەنتى ۋرسۋلا فون دەر ليايەنگە جازىلدى. قۇجاتتىڭ قاشان قارالاتىنى بەلگىسىز. وسىعان دەيىن ولكەنىڭ پرەمەر-مينيسترى دەنيس شمىگال ۋكراينا ۇيىمعا ارنايى تارتىپپەن كىرەتىنىن بىلدىرگەن.
وسىعان دەيىن زەلەنسكيي ۆيدەو ۇندەۋ جاساپ، ەۋروپا وداعىنا شۇعىل تۇردە ۋكراينانى قوسۋدى سۇراعان. ول ۋكراين ارمياسى ءوز جەرى ءۇشىن عانا ەمەس، جالپى ەۋروپا ءۇشىن سوعىسىپ جاتقانىن ايتىپ، "ۇيىمعا كىرۋگە لايىقتى" ەكەنىن جەتكىزگەن.
رەسەي پرەزيدەنتى ۆلاديمير ءپۋتيننىڭ "دونباستاعى حالىقتى قورعاۋ" تۋرالى مالىمدەمەسىنەن كەيىن ورىس اسكەرى 24 اقپاندا ۋكرايناعا باسىپ كىردى. بەس كۇننەن بەرى رەسەي ۋكراينانىڭ بارلىق ايماقتارىن اتقىلاپ بومبالاپ جاتىر.
ۋكراينانىڭ اقپارات قۇرالدارى رەسەيدىڭ شابۋىلىنان 352 بەيبىت تۇرعىن قازا بولعانىن، ولاردىڭ ىشىندە بالالار بار ەكەنىن جازىپ جاتىر. وقيعانىڭ العاشقى كۇنى كييەۆ 137 سارباز قۇربان بولعانىن مالىمدەدى. ودان كەيىن جاعداي بەلگىسىز.
ۋكراينا قورعانىس مينيسترلىگى رەسەي 5300 ساربازىن جوعالتتى دەپ مالىمدەگەن. بۇل ساناتتىڭ ىشىندە قازا تاپقاندار، تۇتقىنعا تۇسكەندەر جانە جارالانعاندار كىرەدى.
رەسەي بولسا ناقتى قانشا اسكەرىن جوعالتقانى جونىندە رەسمي مالىمەت بەرمەي وتىر.
