پريپياتتاعى ۋكراينا-رەسەي كەلىسسوزدەرىنەن كەيىن كوپ ۇزاماي رەسەي اسكەرى كييەۆكە «يسكاندەر» بالليستيكالىق زىمىرانىمەن شابۋىل جاسادى.
بۇل تۋرالى ۋكراينا ىشكى ىستەر ءمينيسترىنىڭ كەڭەسشىسى انتون گەراششەنكو حابارلادى.
«پۋتيندىك رەجيمنىڭ تاعى ءبىر قىلمىسى. يسكاندەر بالليستيكالىق زىمىرانىنىڭ كييەۆكە شابۋىلى. ناقتى ورنى مەن قۇرباندارى انىقتالىپ جاتىر» دەپ جازدى ول.
وسىدان بىرنەشە مينۋت بۇرىن گەراششەنكو پريپياتتەگى كەلىسسوزدە ۋكراينا رەسەيلىكتەرگە ۋكراينانىڭ بارلىق اۋماعىنان اسكەرلەرىن تولىقتاي شىعارۋدى قامتيتىن قاتاڭ شارتتاردى قويعانىن جازعان.
«كەلەسى كەلىسسوزدەر الدىندا كييەۆ پەن ءماريۋپولدى قورشاۋعا الۋ ارقىلى رەسەي جاعدايىن جاقسارتقىسى كەلەدى. بۇل رەسەيدىڭ سوڭعى ارەكەتى بولادى. وعان ءبىزدىڭ اسكەر دايىن. الدا شەشۋشى شايقاس كۇتىپ تۇر» دەدى گەراششەنكو.
ەسكە سالساق، رەسەي پرەزيدەنتى ۆلاديمير پۋتين دونباس رەسپۋبليكالارى باسشىلارىنىڭ ۇندەۋىنە جاۋاپ رەتىندە ارنايى اسكەري وپەراسيا جۇرگىزۋ تۋرالى شەشىم قابىلداپ، ۋكرايناعا قارسى سوعىس جاريالادى. رەسەي باسشىسى ماسكەۋدىڭ جوسپارىندا ۋكراينا اۋماقتارىن باسىپ الۋ جوق ەكەنىن باسا ايتتى.
دەرەككوز
