ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

جاستارعا جول كورسەتتى

01 ناۋرىز 2022 102
ەلىمىزدە 29 جاسقا دەيىنگى ازاماتتار سانى 4 ميلليونعا جۋىقتايدى. تەپسە تەمىر ۇزەتىن سول جاستاردىڭ 40 پايىزى ەكى قولعا ءبىر كۇرەك تاپپاي، بوس ساندالىپ ءجۇر.



جۇمىسسىزدىقتى جويۋ ماقساتىندا وقۋشىلاردى مەكتەپ قابىرعاسىندا كاسىپكە باۋلۋ كەرەك دەيدى ماماندار. ءتىپتى پرەزيدەنت تە جاستاردى تەحنيكالىق ماماندىقتارعا تارتۋ كەرەكتىگىن ايتقان. ويتكەنى ءقازىر لاقتىرعان تاياق زاڭگەر مەن قارجىگەرگە بارىپ تيەتىن بولدى. ال ەلىمىزدە جول سالاسىنىڭ ماماندارى تاپشى. ەۋروپا مەن ازيانى جالعايتىن، جەر كولەمى بويىنشا الەمدە 9-ورىن الاتىن قازاقستاننىڭ ترانزيتتىك احۋالىن ارتتىرۋ ءۇشىن مىڭداعان شاقىرىم جول سالىنۋى ءتيىس. بۇل اۋقىمدى جۇمىسقا شەتەلدەن مامان شاقىرتپاي-اق، ءوز جاستارىمىزدى جول سالاسىنا باۋلىعان الدەقايدا ءتيىمدى. سوندىقتان «جول اكتيۆتەرى ۇلتتىق ساپا ورتالىعىنىڭ» قىزمەتكەرلەرى مەكتەپتەردى ارالاپ، جاستارعا كاسىبي باعدار بەرۋدى باستادى.



جىل سوڭىنا دەيىن ەلىمىزدىڭ ءار تۇپكىرىندەگى، الىس-شالعاي اۋىلدارداعى ەكى مىڭعا جۋىق ءبىلىم وشاعىن ارالاۋ جوسپاردا بار. وسى اپتادا «جول اكتيۆتەرى ۇلتتىق ساپا ورتالىعى» الماتى وبلىستىق فيليالىنىڭ باسشىسى شەكارا شەبىندە جاتقان كەگەن اۋدانىنا ات باسىن بۇردى. بۇل لاۋازىمعا جاڭادان تاعايىندالعان ماۋلەن ءالىپوۆ العاشقى ساپارىن ءوزىنىڭ تۋعان اۋىلىنان باستاۋدى ءجون ساناعان. جالاڭاش، توعىزبۇلاق، اقاي نۇسىپبەكوۆ اۋىلدارىنداعى ءتورت مەكتەپكە بارىپ، وقۋشىلارمەن كەزدەسۋ ۇيىمداستىردى. وقۋشىلارعا جول سالاسى تۋرالى جان-جاقتى ماعلۇمات بەرىپ، سۇراقتارىنا جاۋاپ بەردى. بۇل مەكتەپ ءبىتىرىپ، ۇلكەن ومىرگە قادام باساتىن جاستاردىڭ ماماندىق تاڭداۋىنا مول مۇمكىندىك. ويتكەنى ءاربىر وقۋشى ءوزىنىڭ يكەمى مەن قابىلەتىنە قاراي بولاشاق باعدارىن قازىردەن ايقىنداۋى ءتيىس. سوندىقتان كەلەلى كەزدەسۋ وتە جوعارى دەڭگەيدە ءوتتى. وقۋشىلاردىڭ ىنتا-ىقىلاسى مەن جول سالاسىنا دەگەن قىزىعۋشىلىعى باسىم ەكەنى بايقالدى. ماسەلەن بولاشاقتا جولشى بولامىن دەگەندەرى قاي ءپاندى تەرەڭدەتىپ وقۋ كەرەكتىگىن، قىزمەتكەرلەردىڭ ايلىعى، جولداردىڭ ساپاسى قالاي باقىلاناتىنى تۋرالى سان ساۋال قويىپ، تۇششىمدى جاۋاپ الدى.


بۇل ساپار بارىسىندا الماتى وبلىسىنداعى جولداردىڭ دا ساپاسى تەكسەرىلدى. ماسەلەن، الماتى-شەلەك-قورعاس تاس جولىنىڭ بويىنداعى قورشاۋلار بۇلىنگەن ەكەن. سونداي-اق تۋريستەر كوپ كەلەتىن كولساي كولدەرىنە باراتىن جولدار جىرتىق-جاماۋ. «جول اكتيۆتەرى ۇلتتىق ساپا ورتالىعى» الماتى وبلىستىق فيليالىنىڭ ماماندارى بۇل كەمشىلىكتەردىڭ ءبارىن تىركەپ، «قازاۆتوجول» مەكەمەسىنە جولدادى. جول بويىنداعى شۇرىق-تەسىكتەر مەن قيراعان قورشاۋلار تەز ارادا قالپىنا كەلتىرىلەتىن بولادى.

«جول اكتيۆتەرى» ۇسو،

الماتى وبلىستىق فيليالىنىڭ باسپا ءسوز قىزمەتى
بۇل ماقالا تۋرالى نە ويلايسىز؟