قاراعاندى وبلىسىندا تەلەكوممۋنيكاسيا قىزمەتىن كورسەتەتىن قازاقستاننىڭ "رەمسترويسەرۆيس" كومپانياسى بۇگىننەن باستاپ رەسەيدىڭ ۋكرايناعا شابۋىلىنا قارسىلىق بەلگىسى رەتىندە رەسەي تەلەارنالارىنىڭ جاڭالىقتارى مەن اقپاراتتارىن تاراتۋدان باس تارتىپ، تەك فيلمدەرىن قالدىردى.
شاحتينسك قالاسى مەن ونىڭ توڭىرەگىندەگى كەنتتەرگە جوعارى جىلدامدىقتاعى ينتەرنەت تاراتاتىن "رەمسترويسەرۆيس" كومپانياسىنىڭ telegram-ارناسى "سوعىسقا جانە سوعىستى ناسيحاتتاۋعا قارسىمىز. سوندىقتان رەسەيدىڭ "فەدەرالدى" ارنالارىنىڭ ورنىنا "حابار24" ارناسىن تاراتۋدى ۇيعاردىق، تۇسىنىستىكپەن قاراۋدى سۇرايمىز" دەگەن حابار تاراتتى.
"رەمسترويسەرۆيس" كومپانياسىنىڭ وكىلى ازاتتىق تىلشىسىنە:
- رەسەيدىڭ جاڭالىقتار مەن اقپاراتتار ارنالارىن ۋاقىتشا وشىردىك. 15-20 ارنا ورنىنا "حابار" تارايدى. كومپانيامىزدىڭ ساياساتى وسىلاي،- دەدى.
كومپانيا وكىلى رەسەي تەلەارنالارىن قاشان قايتا تاراتىنىن ايتا المادى.
بيىل قاڭتاردىڭ 24-ىنە رەسەي ۋكرايناعا اسكەرۋ شابۋىل باستاپ، ونى "ارناۋلى وپەراسيا" دەپ اتاعان ەدى. ءقازىر ۋكراينا اۋماعىندا ۇرىس قيمىلدارى ءجۇرىپ جاتىر.
