نازىم قاھارمان قۋاندىق بيشىمبايەۆپەن قالاي اجىراسقانى تۋرالى "ۋمنىە ليۋدي س اسەل كوجاكوۆوي" يۋتۋب ارناسىنا بەرگەن سۇحباتىندا ايتتى.
"كىم اجىراسقىسى كەلەدى دەيسىز. اجىراسپاس بۇرىن الدىن الا دايىندالۋىمىز كەرەك. كەتۋگە جانە قارسى تۇرۋعا مورالدى جانە قارجىلاي جاعىنان دايىن بولۋىمىز كەرەك. ايتپەسە، ول جاقسىلىقپەن جىبەرمەيدى"، – دەدى نازىم.
نازىم قاھارمان بيشىمبايەۆتىڭ ءۇش جىلعا جۋىق تۇرمەدە وتىرعانىن ەسكە الدى. ول بوستاندىققا شىققاندا ەرلى-زايىپتى ءبىر اي عانا بىرگە تۇرعان.
"تۇرمە ادامداردى وزگەرتەدى. مۇنداي ومىرلىك سىناقتان كەيىن ادام تۇبەگەيلى وزگەرىپ، ءوزىن جاقسى كۇيەۋ، جاقسى اكە رەتىندە كورسەتۋگە تىرىسادى. مەن وعان سوڭعى مۇمكىندىك بەرىپ كوردىم. تۇرمەدەن ءارقاشان مەنىكى دۇرىس دەگەن ويمەن شىقتى. مۇمكىن وزگەرگەن شىعار دەگەن وي بولدى. ءبىز ءبىر ايعا جۋىق بىرگە تۇرىپ كوردىك. الايدا ول وزگەرگەن جوق. قۋاندىقپەن كوپ سويلەستىم، وعان وزگەرۋ ءۇشىن پسيحولوگيالىق جانە رۋحاني تۇرعىدا جۇمىس ىستەۋ كەرەگىن ايتتىم”، – دەدى نازىم قاھارمان.
ول وسى ۋاقىت ارالىعىندا بيشىمبايەۆ ەكەۋىنىڭ اراسىندا ۇلكەن جانجال بولعانىن، بۇل قايتىپ ورالۋعا مۇمكىندىك بەرمەيتىن جاعدايعا اينالعانىن ايتتى.
"شامامەن ءۇش كۇن بويى ۇرىس-كەرىستى توقتاتۋعا تىرىستىم. شىن مانىندە، زورلىقشىلارعا ءسىزدىڭ ەموسياڭىز كەرەك. "سەن جامان ايەلسىڭ؟"، "نەگە سەن ءۇشىن ءبارىن جاسادىم؟" دەگەن سىندى سوزدەردى ايتا باستايدى. ۇنەمى سەنى كىنالى ەتىپ شىعارعىسى كەلەدى. ولار سەنىڭ قانىڭدى، ەنەرگياڭدى، اشۋىڭدى، كوز جاسىڭدى، ءوزىڭدى كىنالى سەزىنۋىڭدى قاجەت ەتەدى"، – دەپ قوستى نازىم قاھارمان.
