توتەنشە جاعداي مينيسترلىگىنىڭ مالىمەتى بويىنشا قۇلسارى قالاسىندا ءۇش مىڭعا جۋىق ءۇي سۋعا كەتكەن. وتىز ءۇش مىڭ ادام ەۆاكۋاسيالانىپ، باسقا وڭىرلەرگە ۋاقىتشا قونىس اۋدارعان. ءۇيى تۇگەلدەي سۋعا كەتكەن قۇلسارى تۇرعىندارىنان Alash.kz پورتالى پىكىر الدى.
«اتىراۋ» ىقشام اۋدانىنىڭ تۇرعىنى ايگەرىم:
ءبىر كۇننىڭ ىشىندە باسپاناڭنان ايىرىلۋ وتە قيىن. تاماعىمىزدان اس وتپەي، ويىمىزدى قورقىنىش بيلەپ وتىر. قۇلسارى قالاسىنىڭ ەر-ازاماتتارى كۇن-تۇن دەمەي سۋ كەلىپ قالادى-اۋ دەگەن جەرلەردىڭ بارلىعىنا بوگەت جاساپ جاتقان. اقتوبەنىڭ سۋعا كەتىپ حالىق ءۇيسىز قالىپ وتىرعانىن بىلە تۇرا،اۋدان باسشىلارى اكىمدەر الدىن-الا قورعانبادى. «اتىراۋ» ىقشام اۋدانىنىڭ تۇرعىندارى ەسكەرتىپ ۆيدەو ۇندەۋ جولداعان بولاتىن. «سۋعا كەتەمىز مىنا اعىس مۇمكىن ەمەس» دەپ سونداعى اكىم سىماقتاردىڭ جاۋاپتارى: «ەشقانداي قاۋەسەتكە سەنبەڭدەر،رەسمي اقپاراتقا سەنىڭدەر سۋ ءبىر قالىپتى دەڭگەيدە تۇر» دەپ ۇيالماي ايتتى.
سۋ اعىسىنا قاراپ تۇرىپ ءاي ءبىر جاندارىڭ اشىمادى ما اياۋشىلدىق جاناشارلىق سەزىمدەرىڭ بولمادى ما،نەتكەن قاتىگەز ەدىڭدەر.بۇل اپات قولدان جاسالىنعان دۇنيە. جەرىم، ەلىم دەپ جاندارىڭ اشىماسا كرەسلودا شالقايىپ نەگە وتىرسىڭدار؟
قۇلسارىنى 70% سۋ باستى سونى كورە تۇرا قالاي ۇيقتاپ، قالاي تاماقتارىڭنان اس ءوتىپ وتىر؟ سەندەردىڭ سالعىرت جۇمىستارىڭنان نەگە قارا حالىق زارداپ شەگىپ، تەنتىرەپ قاڭعىپ كەتۋىمىز كەرەك،ايتىڭدارشى…؟!
ۇيلەرىمىز قانشاما ەڭبەكپەن قانشاما تەرمەن، كرەديتپەن سالىندى، سونى بىلە تۇرا الدىن-الا قورعاپ الا المادىڭدار. بۇكىل قازاقستاندا ەڭ كوپ سالىق تولەيتىن قۇلسارى قالاسىن ەشكىم دە قورعاپ قالا المادى... استى ەلىمىزدىڭ ەڭ ءىرى بايلىعى – مۇنايعا تولىپ تۇرسا دا، ءقازىر ونىڭ ءۇستى لاي سۋمەن تولىق... اللا جازالارىن بەرسىن»،-دەدى كوز جاسىنا ەرىك بەرگەن «اتىراۋ» ىقشام اۋدانىنىڭ تۇرعىنى.
جەمقورلىقپەن كۇرەسپەي مىنا قۇلسارى قالاسى ەشقاشان كوركەيمەيدى.
قۇلسارى قالاسىنىڭ «4 اۋىل» تۇرعىنى گاۋھار حانىم:
«شىنى كەرەك، قازىرگى بولىپ جاتقان جاعدايدىڭ بارلىعى ءتۇسىم سەكىلدى. تاماعىمنان اس باتپاي، كوڭىلىم قۇلازىپ تۇر. جەتى بالام بار، ءقازىر بارلىعى اركىمنىڭ ءۇيىن جاعالاپ بىتىراپ ءجۇر. سولاردىڭ بولاشاعىنىڭ قامىن جاساپ، ۇستىمە ءبىر كيىم، اۋزىما ءبىر ءتىس سالماي جۇگىرىپ جۇرگەن جەردەن مىناداي سويقان اپاتتىڭ باسپانامىزدى الىپ كەتۋى ۇلكەن سوققى بولدى. شاعىن تىگىن بيزنەسىم بار ەدى، ءقازىر ەسەپتەپ قاراسام، ءۇش ميلليوننان استام شىعىن بار. ءۇيدىڭ باعاسىن ايتپاسا دا بەلگىلى. تىرناقتاپ جيعان-تەرگەنىمىزدىڭ بارلىعى زايا كەتتى. نەگىزى، جولداسىم بىرنەشە كۇن بۇرىن سۋ كەلەدى دەپ ايتىپ ءجۇردى. بەلسەندىلەر اكىمدىككە دە ەسكەرتكەن. الايدا ەش الدىن-الا امال جاسالمادى. تۇگەل قالانىڭ 70 پايىزى سۋعا كەتكەنى ماسقارا ەمەس پە؟ ءقازىر ءۇيدىڭ باعاسى قىمبات. ۇكىمەت بارلىعىن تولەي مە؟ بۇرىندارى جاڭبىر سۋىنان زارداپ شەگىپ، اكىمدىككە بارعانىمىزدا ەشقانداي كومەك كورسەتپەي، ءوز قالتامىزدان اقشا شىعارىپ ءۇيىمىزدى رەتتەپ العان بولاتىنبىز. ال ءقازىر ءۇي ءتىپتى رەتتەلۋگە كەلمەيدى. بوسقىندار سەكىلدى قاشانعى جۇرەمىز؟ جاعداي قاشان رەتتەلەدى؟ تابيعي اپات دەپ بار كىنانى تابيعات انادان كورۋ قاتەلىك. وتىز جىل بۇرىن بولعان تاسقىننان ەش ساباق المادىق...»،- دەدى ول.
