ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"ادامدار قايىقپەن قاتىناپ ءجۇر". رەسەيدىڭ ورىنبور، ورسكى قالالارى سۋ استىندا قالدى

08 ءساۋىر 2024 398

كورشى رەسەيدە جاعداي اۋىر.  

قارعىن سۋ قالانى باسىپ قالدى. ورىنبور وبلىسىندا توتەنشە جاعداي رەجيمى ەنگىزىلدى. ورسكىدەگى جاعداي دا وتە اۋىر دەپ باعالانىپ وتىر. ورسكى قالاسى ءبىزدىڭ اقتوبەدەن 170 شاقىرىم قاشىقتا. سوڭعى مالىمەتتەر بويىنشا، ورسك مۇناي وڭدەۋ زاۋىتى جۇمىسىن توقتاتقان.

تۇرعىندار تاسقىنىنان قاتتى زارداپ شەگىپ جاتىر. اسىرەسە ورىنبور وبلىسىنداعى احۋال كۇردەلى. ورسك قالاسىندا سۋ بوگەتى بۇزىلىپ، 6 مىڭ 600-دەن استام ءۇيدى سۋ باستى. تۇرعىنداردىڭ ايتۋىنشا، ورسكىدە قالاسىنىڭ ەسكى بولىگىندەگى كوشەلەردىڭ ءبارىن سۋ باسقان. تاسىعان سۋ ۇيلەردىڭ توبەسىنە دەيىن جەتكەن. ادامدار قايىقپەن قاتىناپ ءجۇر. جالپى ورىنبور وبلىسىنداعى جايىق سۋى ون ءبىر مەترگە دەيىن كوتەرىلگەن. ماماندار بۇل 2014 جىلى سالىنعان جاڭا بوگەتتىڭ جوبالىق دەڭگەيىنەن ەكى ەسە كوپ دەيدى.

ورىنبور وبلىسىنىڭ گۋبەرناتورى دا مۇنى ءوڭىر تاريحىنداعى ەڭ ءىرى سۋ تاسقىنى دەپ ايتتى. جەرگىلىكتى بيلىك باشقۇرتستان مەن چەليابى وبلىسىنان يريكلا وزەنىنىڭ تاسۋى ءبىراز باسىلعانىمەن ءالى دە قاتتى دەپ وتىر. ءقازىر يريكلينسك قويماسىنان اعىزالاتىن سۋ مولشەرى بەس ءجۇز تەكشە مەترگە ازايتىلدى. دەگەنمەن، ماماندار جاقىن ارادا نوسەر جاۋى مۇمكىن دەپ بولجايدى.

ورىنبور وبلىسىندا رەسەيدىڭ وزگە وڭىرلەرىنەن كەلگەن جەتى ءجۇز قۇتقارۋشى جۇمىس ىستەپ جاتىر. توتەنشە جاعدايلار مينيسترلىگىگىڭ وكىلىن الەكساندر سيتنيكوۆتىڭ ايتۋىنشا، ورسك قالاسىنىڭ ەسكى بولىگىندە سۋ ءالى تاسىپ جاتىر. اپات اۋداندارىنان تۇرعىنداردى ەۆاكۋاسيالاۋدى توتەنشە جاعدايلار مينيسترلىگى مەن باسقا دا قۇرامالار جۇزەگە اسىرۋدا. ادامداردى ءقاۋىپسىز جەرلەرگە قايىقتارمەن كوشىرۋ ءۇشىن پەرم وبلىسىنان ارنايى اەروموبيل توبى كومەككە كەلدى. ءقازىر سۋ باسقان ايماقتان ءتورت جارىم مىڭنان استام تۇرعىن ەۆاكۋاسيالاندى. جەرگىلىكتى بيلىك 33 ورنالاستىرۋ پۋنكتىن اشامىز دەپ مالىمدەگەن. ولار 23 مىڭ ادامدى قابىلداي الادى.

ورىنبور وبلىسىنان باسقا رەسەيدىڭ تاعى 35 ايماعى سۋ تاسقىنىنان زارداپ شەگىپ وتىر. التاي ولكەسىندە دە توتەنشە جاعداي ەنگىزىلدى. بۇل ايماقتا بەس جۇزدەن استام ءۇي سۋ استىندا قالدى. سامارا وبلىسىنداعى توعىز اۋداندى سۋ باستى. بەس جۇزگە جۋىق ادام ەۆاكۋاسيالاندى.

سۋ تاسقىنى سالدارىنان ماري ەل ولكەسىندە بوگەت بۇزىلدى. ماسكەۋ وبلىسىنىڭ دا بىرنەشە ايماعىن سۋ باسىپ جاتىر. ال ومبى مەن نوۆوسيبيرسك وبلىستارىندا جوعارى ازىرلىك رەجيمى جاريالاندى.

بۇل ماقالا تۋرالى نە ويلايسىز؟