ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

سۋبەكتيۆتى پىكىرلەرگە جاۋاپ بەرۋگە ەش نەگىزىمىز دە جوق - ساياسات نۇربەك

31 مامىر 2024 227

عىلىم جانە جوعارى ءبىلىم ءمينيسترى ساياسات نۇربەك ۇلتتىق مەملەكەتتىك عىلىمي-تەحنيكالىق ساراپتاما ورتالىعىنىڭ باسشىسى بولعان ارمان قاشقىنبەكوۆتىڭ پرەزيدەنتكە جازعان شاعىمىنا جاۋاپ بەردى، دەپ حابارلايدى Alash.kz.

ءمينيستردىڭ جاۋابى

– 2023 جىلى ءبىز سىبايلاس جەمقورلىق اگەنتتىگىمەن بىرىگىپ، ارنايى ساراپتاما جۇرگىزدىك. عىلىم سالاسىن قاتىستى. 46 ادامنان قۇرىلعان ارنايى بريگادا جارتى جىل وتىردى. ونىڭ ىشىندە ۇلتتىق عىلىمي-ساراپتامالىق ورتالىقتىڭ دا ەگجەي-تەگجەيلى جۇمىسى تەكسەرىلدى. سونىڭ ارقاسىندا بىزگە 105 پۋنكتتەن قۇرالعان ارنايى جول كارتاسى بەكىتىلدى. سونىڭ ىشىندە قاشقىنبەكوۆ مىرزا باسقارعان مەكەمەگە دە ءبىرقاتار سۇراق قويىلدى، – دەيدى Ulysmedia.kz ساياسات نۇربەكتىڭ سەنات كۋلۋارىنداعى ءسوزىن.

ءمينيستردىڭ سوزىنشە، جول كارتاسىنىڭ نەگىزىندە ىشكى اۋديت باسقارماسى قىزمەتى، عىلىم كوميتەتىنىڭ قىزمەتكەرلەرى اتالعان مەكەمەگە وسى جىلدىڭ اقپان ايىندا ارنايى تەكسەرۋ كوميسسياسىن جىبەرگەن. ىشكى اۋديت قىزمەتكەرلەرى ارنايى ەسەپ بەرگەن.

– سول ەسەپتىڭ نەگىزىندە قاشقىنبەكوۆ مىرزا وتكەن ايدىڭ باسىنان باستاپ قىزمەتىنەن بوساتىلدى. ەندى پرەزيدەنتكە نەمەسە باسقا مەكەمەلەرگە جازىلعان اقپاراتتاردى مۇقيات وقىساڭىز، بىردە-بىر ناقتى فاكت كەلتىرىلمەگەن. كوبىنەسە، سۋبەكتيۆتى، ءوزىنىڭ جەكە پىكىرلەرى جازىلعان. سۋبەكتيۆتى پىكىرلەرگە جاۋاپ بەرۋگە ەش نەگىزىمىز دە جوق. ناقتى فاكتىلەر تىركەلگەن جاعدايدا تەكسەرۋ كوميسسياسى سىبايلاس جەمقورلىققا قارسى كۇرەس اگەنتتىگىمەن بىرلەسە جاساعان ساراپتاما قورىتىندىسىن بەرۋگە دايىنبىز، – دەيدى ساياسات نۇربەك.

ورتالىققا بايلانىستى نەگە اڭگىمە كوپ؟

– كوميسسيانىڭ حاتتاماسىندا ءبىرقاتار قىزمەتتىك قۇزىرەتىنە، ءىسساپارلارىنا بايلانىستى جازىلعان. ەڭ باستىسى، ورتالىق اياسىندا وسىنداي نەگە كوپ اڭگىمە جۇرەدى؟ عىلىمي قارجىلاندىرۋ جوباسى ءبىرىنشى ساتىدا سول ورتالىقتىڭ ساراپتاماسىنان وتەدى. گرانت جوباسى ءبىرىنشى ساتىدا سول ورتالىقتىڭ ساراپتاماسىنان وتەدى. بۇل ساراپتامالىق ورتالىق عىلىمي جوبالارعا قاراجاتتىڭ بەرىلەتىنىن نەمەسە بەرىلمەيتىنىن ايقىندايدى. سوندىقتان، قىزىعۋشىلىق تا، قاۋىپ-قاتەر دە وتە كوپ. تازالىق، مولدىرلىك – پرەزيدەنتتىڭ تاپسىرماسى. مينيسترلىكتىڭ قۇرىلعان سەبەبى دە سول، – دەيدى ول.

مينيستر ءوز وتستاۆكاسى جايلى نە ويلايدى؟

وسىلاي شاعىنعان ادامدار ساياسات نۇربەكتىڭ وتستاۆكاسىن دا تالاپ ەتۋى مۇمكىن. وعان نۇربەك بىلاي جاۋاپ بەرەدى.

– بۇل شەشىمدى تەك ۇكىمەت قابىلدايدى، پرەزيدەنتىمىز قابىلدايدى. ءبىز مينيسترلىكتىڭ قۇزىرەتى اياسىندا قىزمەتىمىزدى جالعاستىرامىز، – دەدى مينيستر.

قاشقىنبەكوۆتىڭ پرەزيدەنتكە حاتى

ەسكە سالا كەتەيىك، بۇعان دەيىن پرەزيدەنت جانىنداعى ۇلتتىق قۇرىلتاي مۇشەسى جانە "ۇلتتىق مەملەكەتتىك عىلىمي-تەحنيكالىق ساراپتاما ورتالىعى" اق باسقارما ءتوراعاسى ارمان قاشقىنبەكوۆ عىلىم جانە جوعارى ءبىلىم ءمينيسترى ساياسات نۇربەكتىڭ قۇزىرەتىنە كۇمان كەلتىرگەن ەدى. ول مەملەكەت باسشىسىنا حات جازعان.

“مەنىڭ سىزگە جۇگىنۋىمە ەلىمىزدىڭ عىلىمدى باسقارۋ سالاسىنداعى قالىپتاسقان احۋال سەبەپ بولدى. ق ر عىلىم جانە جوعارى ءبىلىم مينيسترلىگىنىڭ (بۇدان ءارى - ق ر ءۇاق)، مينيستر س. ن. نۇربەكتىڭ، سونداي - اق ۆيسە-مينيستر د. ج. احمەد-زاكيدىڭ، عىلىم كوميتەتىنىڭ ءتوراعاسى گ. جانقۋاتوۆتىڭ ساۋاتسىز جانە كاسىبي ەمەس جۇمىسى بار، ول عالىمداردى گرانتتىق قارجىلاندىرۋ بويىنشا تۇراقتى ىركىلىستەرگە، مەملەكەتتىك عىلىمي-زەرتتەۋ جۇمىستارىنىڭ مەرزىمدەرى بويىنشا كىدىرىستەرگە اكەلەدى. عىلىمي قوعامداستىقتىڭ ۇسىنىستارى مەن سىن – ەسكەرتپەلەرىن ەلەمەۋ، "كەلىسپەيتىندەرگە" پسيحولوگيالىق شابۋىلدار جاساۋ، ناقتى دامۋ ساياساتىنىڭ بولماۋى،” - دەلىنگەن ۇندەۋ ماتىنىندە. 

قاشقىنبەكوۆتىڭ سوزىنشە، قارجىلاندىرۋ كولەمى ەداۋىر ۇلعايعانىنا قاراماستان (2022 جىلى-56 ملرد. تەڭگە.، 2023-156 ملرد. تگ) ەكونوميكانىڭ ناقتى سەكتورىنداعى عىلىمي جوبالار ىسكە اسپايدى، "كوبىنە ەسەپ بەرۋ ءۇشىن قاعاز جۇزىندە عانا قالادى". 

بۇل ماقالا تۋرالى نە ويلايسىز؟