ايىپتالۋشى سوت ۇستىندە بۇرىنعى ايەلىن جانجال كەزىندە اجال قۇشتىرعانىن، اشۋ بۋعاندا قىلقىندىرىپ قويعانىن ايتقان.
«ءبىراق بۇل جەردە ادەيى جوسپارلانعان ارەكەتتەرى ايتقانىمەن قيسىنعا كەلمەيدى. ونى سول ۋاقىتتا تاكسي كۇتىپ تۇرعان. تۇنشىقتىرۋ كەزىندە اۋىز جانە مۇرىندى جاپقان. مەديسينالىق ءبىلىمى بار قىلمىسكەر ءولتىرۋ ءۇشىن قالاي تۇنشىقتىرۋدى بىلگەن»، - دەپ جازادى دينا ءتاڭسارى.
اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا «ادام ءولتىرۋ» بابىمەن تەرگەلگەن ىسكە ۇكىم شىقتى. ايىپتالۋشى ح. قىلمىستىق كودەكستىڭ 99-بابى 1-بولىگىمەن كىنالى دەپ تانىلىپ، 11 جىلعا سوتتالدى.
جابىرلەنۋشى تاراپ سوت ۇكىمىمەن كەلىسپەيتىنىن جەتكىزىپ، سوتتالۋشىنىڭ اكەلىك قۇقىنان ايىرۋعا ارىز تۇسىرەتىنىن ايتتى. مارقۇم 26 جاستا بولعان. ايبانۋدىڭ ارتىندا 6،5،3 جاسار بالالارى قالدى.
ەسكە سالا كەەتيىك، قايعىلى وقيعا تەمىر اۋدانى شۇبارشي اۋىلىندا بولعان. ءبىز بۇعان دەيىن دە بۇل وقيعا جايلى جازعانبىز. ەرلى-زايىپتىلار 2022 جىلى اجىراسقان. الايدا ەكى جىلدان كەيىن ول وتباسىنا قايتا ورالىپ، ايەلى ونى قابىلداعان.
سول ءتۇنى بالالار كورشى بولمەدە ۇيىقتاپ جاتقان. ايبانۋ اس ۇيدە كۇيەۋىنە ءشاي قويىپ، ارتىنا بۇرىلا بەرگەندە ەر ادام شابۋىلداپ، تۇنشىقتىرىپ ولتىرگەن.
"ايەلدىڭ تۋىستارىنىڭ ايتۋىنشا ەر ادام اقتوبەدەن تاكسيمەن كەلگەن. ال تاكسيستكە اۋىلدىڭ شەتىندە كۇتىپ تۇرۋىن ايتقان. بۇل مۇقيات جوسپارلانعان سۋىق قاندى كىسى ءولتىرۋ. ەر ادام ءبارىن الدىن-الا جوسپارلادى. ال ونىڭ ءموتيۆى ول بولىسكىسى كەلمەگەن جىلجىمايتىن مۇلىك ماسەلەسى. ايبانۋ قالادا ەمەس، اۋىلدا تۇردى. وعان ماتەريالدىق جاعىنان قيىن بولدى. ەكس-جولداسى ەكەۋىنە ورتاق پاتەر بولدى"، - دەدى دينا حانىم.
"ادام ءولتىرۋ فاكتىسى بويىنشا قىلمىستىق تەرگەۋ اياقتالىپ، پروسەسسۋالدىق شەشىم قابىلداۋ ءۇشىن سوتقا جولداندى"، - دەپ جاۋاپ بەردى اقتوبە وبلىسىنىڭ ءىىد.
