ءماجىلىستىڭ قوعامدىق پالاتاسىنىڭ وتىرىسىندا وسىدان بىرنەشە جىل بۇرىن پرەزيدەنتكە ۇمىتكەر بولعان ساياساتكەر ءامىرجان قوسانوۆ ءسوز سويلەدى. ول وتىرىستا تالقىلانعان جەمقورلىق باعىتىنداعى پروبلەمالارعا بايلانىستى ويىن ورتاعا سالدى.
– بىرىنشىدەن، الماتىدان سالەم. جەر سىلكىنگەننەن كەيىن بىزگە جاندارىڭىز اشىپ جاتىر. امانبىز، ساۋمىز. ۇيلەر دە قۇلاماسىن، جۇيە دە قۇلاماسىن، – دەپ باستادى اڭگىمەسىن ول.
ءامىرجان قوسانوۆتىڭ ايتۋىنشا، باتپانداپ كىرەتىن نارسە مىسقالداپ شىعاتىنىنداي، 30 جىل بويى ورنىعىپ، ءومىر سالتىنا اينالعان جەمقورلىقتى ءبىر كۇندە، اپ-ساتتە شەشۋ مۇمكىن ەمەس ەكەنىن قوعام تۇسىنەدى. ءبىراق جەمقورلىققا قارسى زاڭنامامەن كۇرەسۋ نيەتى بارىن اتاپ وتەدى.
– زاڭ جوباسىن قاراپ شىقتىم. كوپتەگەن باپتى قولدايمىن، – دەيدى ول.
قوسانوۆ وتىرىستا ءۇش ماسەلە كوتەردى. ايتۋىنشا، بىرىنشىدەن – دەكلاراسيا. ساياساتكەر “دەكلاراسيا تاپسىرۋ نەلىكتەن سوزىلىپ كەتتى؟” دەپ سۇراق قويادى. پرەزيدەنتتەن باستاپ اۋىل اكىمىنە، مۇلكىنە، قاراجاتىنا قاتىستى دەكلاراسياسى بۇگىن اشا سالۋ كەرەك، ايتپەسە ەسكى قازاقستاننىڭ وكىلدەرى سونىڭ ءبارىن قايتا راسىمدەپ جاتقان سياقتى” دەيدى ول.
ەكىنشىدەن، قوسانوۆ مۇددەلەر قاقتىعىسى ماسەلەسىن اتاپ وتەدى.
– كەزىندە پرەزيدەنت نازاربايەۆتىڭ كلاستاسىنىڭ دا بالالارى ءوسىپ كەتكەنىن بىلەسىزدەر. سوندىقتان، مەنىڭشە، وسى جەردە ساراپشىلار بولا وتىرىپ، قازاق ۇلتىنىڭ ەرەكشەلىكتەرىن ەسكەرىپ، تەك باتىس ستاندارتتارىن ەمەس، ءبىزدىڭ دە ستاندارتتارمەن قاراۋ كەرەك. انتيكوردى جازالاۋشى ورگان ەمەس دەيدى. ءبىر قوعامدا ءبىر تۇسىنبەۋشىلىك بار. بۇكىل ايىپتاۋ انتيكوردىڭ اۋزىنان شىعادى. انتيكوردىڭ وزىنە قانداي باقىلاۋ بار؟ وندا قانداي ازاماتتار ىستەپ جاتىر؟ انتيكوردىڭ ءوز ىشىندە ساياسي جەمقورلىق بولماس ءۇشىن قانداي مەحانيزمدەردى قولدانىپ جاتىرسىزدار. قوعام وعان دا قاراپ وتىر، – دەيدى ول.
ءامىرجان قوسانوۆ “ەسكى جانە جاڭا قازاقستاننىڭ اراسىنداعى تايتالاس ساياسي تۇرعىدان عانا ەمەس، مەنشىك، مۇلىك، قارجى، كاپيتال توڭىرەگىندە ءجۇرىپ جاتىر” دەپ ەسەپتەيدى.
– انتيكوردان كەلگەن ازامات بۋحگالتەردىڭ كولىگىنەن 1 ملرد تەڭگە تابىلدى دەپ جاتىر. بىزدە قالاي بولعاندا دا، نازاربايەۆتىڭ زامانىندا دا بولدى، توقايەۆتىڭ زامانىندا وكىنىشكە قاراي – قايتالانىپ جاتىر: شاباقتاردى ۇستايدى، ال تۇيەنى تۇگىمەن جۇتقان اكۋلالار ءالى ءجۇر. ءبىرىنشى باستىق الماسا، تومەندەگىسى المايدى. 1 ملرد تەڭگەنى جەگەن بۋحگالتەر دەگەنگە ەشكىم سەنبەيدى، – دەيدى ول.
