ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ءتىل جاناشىرى بوستاندىققا شىقتى

26 قاڭتار 2024 89


مەملەكەتتىك ءتىلدىڭ كەڭىنەن قولدانىلۋىن تالاپ ەتىپ جۇرگەن ءتىل جاناشىرى رۋزا بەيسەنبايتەگى بوستاندىققا شىقتى.




قازاق ءتىلىن قورعاعان رۋزانى  ەل دە قورعاپ قالدى!

ايدىڭ-كۇننىڭ امانىندا ايماڭداي رۋزا اپايىمىزدى جوعالتىپ الىپ، توتەنشە جاعدايدا وتكەن كۇندەرىمىز دە ارتتا قالدى. قازاق ءتىلىنىڭ قورعانى رۋزا اپايىمىز ورتامىزعا ورالدى.

كەشەگى ءبىر كۇنىمىز بەن ءتۇنىمىز بيلىكتەگى جاۋاپتى تۇلعالارمەن سويلەسۋگە كەتتى. كەرەكۋ ءوڭىرى باسشىلارىمەن دە ءسوزىمىز از بولعان جوق...

اقىرى، ادىلەتتىلىك ورنادى. قازاقتىڭ قايسار قىزى، قازاق ءتىلىنىڭ جانكەشتى كۇرەسكەرى رۋزا بەيسەنبايتەگى اپايىمىز بۇگىن بوستاندىققا شىقتى!

قازاق ءتىلى بوستاندىققا شىقتى دەسەك تە بولادى!رۋزا اپايمەن سويلەستىك، كوڭىل-كۇيى دۇرىس. ءقازىر ۇيىندە. ەلگە راحمەت ايتۋدا. قاسىندا كەرەكۋلىك ۇلتشىل ازاماتتار سەرىك ەلىكباي مەن مەدەت بار.

تال تۇستە توبەمىزدەن جاي تۇسكەندەي بولعان جايسىز وقيعانىڭ جاقسىلىقپەن اياقتالۋىنا ءوز ۇلەستەرىن قوسقان قالىڭ ەلدىڭ قايراتىنا ريزامىن. قيىندىقتان شىعۋ ءۇشىن ءبىر جۇدىرىق بولىپ جۇمىلا بىلگەن جۇرتقا العىسىمىز شەكسىز!

قازاق ءتىلىن قورعاعان رۋزا اپايدى ەل دە قورعاپ قالدى! ويتكەنى تارازىدا تەك ادام تاعدىرى عانا ەمەس، ءتىل تاعدىرى - ەل تاعدىرى تۇردى! – دەپ جازدى دەپۋتات قازىبەك يسا.

وسى ورايدا ول العاشقى  كۇننەن بىردەن قولداعان ءبىر توپ دەپۋتات ارىپتەستەرىنە ريزاشىلىعىن ءبىلدىردى.
سونىمەن قاتار بيلىكتەگى جاڭاشا ويلاي باستاعان كوكىرەگى وياۋ، كوزى اشىق ازاماتتارعا كوپ راحمەت! بيلىكتە دە جاڭا تۇرپاتتى جاۋاپتى تۇلعالار بار ەكەنىنە كوز جەتكىزدىك.

ەگەر ادام بۇرىن-سوڭدى مي جۇيكەسى اۋىرۋىمەن  اۋىرىپ، ارنايى ەسەپكە الىنباعان بولسا، ونى سوت شەشىمىنسىز بىردەن پسيحونيەۆرولوگيالىق ديسپانسەرگە، ياعني جىندىحاناعا ماجبۇرلەپ قاماپ تاستاۋعا  ەشكىمنىڭ قۇقى جوق، بۇل زاڭدى بۇزۋ!

ەندى وسى زاڭسىزدىققا بارعاندار جاۋاپقا تارتىلۋى ءتيىس!

ءيا، بۇل كەشەگى ويلارىنا كەلگەنىن ىستەگەن وتىز جىلدىق بيلىكتىڭ، ءوزىن قور، وزگەنى زور تۇتقان قۇلدىق سانالى ساياساتتان  قالعان جارىلىستاردىڭ جارالى ىزدەرى. ەندىگى مىندەت - زارداپ اكەلەر جارىلىستاردىڭ  بارلىعىن زالالسىزداندىرۋ بولماق. ول ارينە ءاربىر  تاۋەلسىزدىك العان مەملەكەتتەر ءوتۋى ءتيىس - وتارسىزدانۋ ساياساتى مەن ۇلتتىق يدەولوگيا.

ۇلتتىق يدەولوگيا بولماسا، ءاربىر اياق باسقان جەردەن وسىلاي قاۋىپ-قاتەردىڭ ءتۇتىنى شىعا بەرەتىنى بەلگىلى.

ال ۇلتتىق يدەولوگيانىڭ نەگىزى - مەملەكەتتىك ءتىل تۋرالى زاڭ قابىلداۋ! مەملەكەتتىك ءتىلدى مىندەتتەۋ - مەملەكەتتىڭ مىندەتى! رۋزا مەن قازىبەكتەردىڭ مىندەتى ەمەس… پارىزى بولسا دا…

سوندىقتان زاڭ ارقىلى شەشىلۋى ءتيىس بارلىعى.

رۋزا اپايىمىزعا زور   دەنساۋلىق، قاجىر-قايرات  تىلەيمىز! – دەدى دەپۋتات.

24 قاڭتار كۇنى ساعات 16:20 شاماسىندا 103 نومىرىنە پاۆلودار قالاسىندا ايەل ادام كوشەدەگى ازاماتتارعا اگرەسسيا تانىتىپ جاتقانى تۋرالى حابارلاما كەلىپ ءتۇستى.
وقيعا ورنىنا كەلگەن مەديسينالىق بريگادا پسيحيكالىق اۋىتقۋلارى بەلگىلەرىمەن ر.ب. ەسىمدى 66 جاستاعى ايەل ادامدى پاۆلودار وبلىستىق پسيحيكالىق دەنساۋلىق ساقتاۋ ورتالىعىنا جەتكىزدى.

ورتالىق دارىگەرلەرى تاراپىنان ناۋقاسقا ەكى كۇن بويى ەم قابىلداۋ شارالارى جاسالدى. مەديسينا قىزمەتكەرلەرىنىڭ قاراۋىنان كەيىن دەنساۋلىق جاعدايىنىڭ جاقسارۋىنا وراي، كونسيليۋم شەشىمىمەن ناۋقاس ديسپانسەرلىك باقىلاۋ ۇسىنىسىمەن ۇيىنە قايتارىلدى.

دەنساۋلىق ساقتاۋ سالاسىنداعى زاڭناماعا سايكەس، الداعى ۋاقىتتا ناۋقاستىڭ پسيحيكالىق اۋىتقۋلارى ناشارلاپ، اينالاسىنداعى ادامدارعا زيان كەلتىرۋ ىقتيمالدىعى قايتا بايقالعان جاعدايدا، ول ەمدەۋگە جىبەرىلەتىن بولادى، – دەپ حابارلادى پاۆلودار وبلىسى دسب.

بۇل ماقالا تۋرالى نە ويلايسىز؟