ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

وزبەكستان جاۋاپ بەردى، قازاقتار ءۇنسىز

26 قاڭتار 2024 57


رەسەيدەگى ارانداتۋشىلار ايىلىن جيار ەمەس. كۇنى كەشە رەسەي تاريحشىسى ميحايل سمولين 1917 جىلعى قازان توڭكەرىسىنە دەيىن قازاق پەن وزبەك دەگەن ۇلت بولماعان دەپ مالىمدەمە جاساعان بولاتىن. بۇعان سىرتقى ىستەر مينيسترلىگى ەشقانداي رەاكسيا تانىتپادى.

 



ال وزبەكستان تاراپى بۇعان جاۋاپ بەردى. وسى ورايدا جۋرناليستەر پارلامەنت سەناتى كۋلۋارىندا سىرتقى ىستەر ءمينيسترىنىڭ ورىنباسارى نازيرا نۇربايەۆادان رەسەيلىك تاريحشىنى قارا تىزىمگە ەنگىزەمىز بە سۇرادى.
قوعامدا كەيبىر جەكە تۇلعالار وتكەنگە جانە قازاقستان تاريحىنا قاتىستى ءتۇرلى پىكىر ايتادى. مەنىڭ ويىمشا، جەكە تۇلعالاردىڭ پىكىرىنە كوممەنتاريي بەرۋدىڭ كەرەگى جوق. ونىڭ زاڭ جانە پراكتيكا تۇرعىسىنان ءمانى جوق. سوندىقتان باسقا سۇراقتارىڭىز بولسا، اپتانىڭ ءار دۇيسەنبىسىندە سىرتقى ىستەر مينيسترلىگىنە وتەتىن باسپا ءسوز ءماسليحاتىنا شاقىرامىز. مۇندا وسىنداي سۇراقتار قويىلادى، – دەپ جاۋاپ بەردى ول.

جۋرناليستەر "قازاقستان بۇعان جاۋاپ بەرمەي مە؟ سەبەبى، بۇل ۇلتتىق بىرەگەيلىككە قاتىستى ماسەلە عوي"، – دەپ سۇرادى.

مەن سۇراڭىزعا جاۋاپ بەردىم. راقمەت، – دەپ قىسقا قايىردى سىرتقى ىستەر ءمينيسترىنىڭ ورىنباسارى
نازيرا نۇربايەۆا.

ماسەلە قايدان شىقتى؟

نتۆ تەلەارناسىنىڭ «مەستو ۆسترەچي» باعدارلاماسىنا سۇحبات بەرگەن تاريحشى ءارى جازۋشى ميحايل سمولين قازاق، وزبەك، ازەربايجان دەگەن ۇلتتار ەشقاشان بولماعان، ولار قولدان جاسالعان دەگەن ءسوز ايتقان.
«قازاقستان دەگەن قالاي پايدا بولدى؟ و باستا رسفسر قۇرامىنداعى قازاق ءسسر-ى دەگەن پايدا بولدى. ياعني ەشقانداي قازاق دەگەن بولعان جوق. كەيىن قازاق ءسسر-ىنىڭ قۇرامىندا قىرعىز ءسسر-ى دەگەندى قۇردى. ودان كەيىن ولاردى رسفسر-دەن ءبولىپ شىعاردى. ول جەردە ۇلت قالىپتاستىرۋعا قاتىستى نەبىر سوراقى شەشىمدەر ىسكە استى. مىسالى، ريەۆوليۋسياعا دەيىن وزبەك دەگەن بولعان جوق. ونداي ەتنيكالىق اتاۋ بولعان ەمەس. الدى دا بىرنەشە ورتالىق ازياداعى ۇلتتان وزبەكتەردى جاساپ شىقتى. تۋرا سولاي، ازەربايجان ۇلتىن ايتساق بولادى. ازەربايجان دەگەن ۇلت ريەۆوليۋسياعا دەيىن بولعان ەمەس. ايتپاعىم رەسەي يمپەرياسىنىڭ جەرىن ءتۇرلى ەتنيكالىق توپتارعا ءبولىپ بەردى»، - دەيدى ول.

فوتو dzen.ru

 

بۇل ماقالا تۋرالى نە ويلايسىز؟