ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ساتىبالدى ءوزىمدى ساتام با دەيدى. تۇسىپبايەۆا ءوزىڭدى سات دەيدى.

12 قاڭتار 2024 67
شاكەن ايمانوۆ اتىنداعى «قازاقفيلم» اكسيونەرلىك قوعامىنىڭ جەرى جۇڭگو كولىكتەرىن ساتاتىن الدەبىر كومپانياعا جالعا بەرىلگەنى، ال قاراشاڭىراقتىڭ پرەزيدەنتى ازامات ساتىبالدىنىڭ اۆتوكولىك جارنامالاۋدان قولى تيمەي جۇرگەنىن اپتا باسىندا كتك ءتىلشىسى ايتىپ، سيۋجەت تاراعان بولاتىن. ىلە شالا ازامات ساتىبالدى جاۋاپ بەردى.

بەلگىلى اكتەر قۋاندىق دۇيسەبايەۆ ارىپتەسىنىڭ ASPAN MOTORS كومپانياسىنىڭ امباسسادورى رەتىندە كومپانيانىڭ كولىكتەرىن جارنامالاۋمەن اينالىسىپ جۇرگەنىن سىنعا العان ەدى. قازىرگى كەزدە كينوستۋديانىڭ الدىندا وسى كومپانيانىڭ كولىكتەرى كوبەيىپ كەتكەن. ساتىبالدى بوس تۇرعان عيماراتتى جالعا بەرگەنىن راستادى. الايدا «ول كولىكتەر ساتىلمايدى، تاكسوپارككە تيەسىلى» دەپ اڭگىمەنى قىسقا قايىردى. مۇنداي قادامعا بارۋىنا قاراماعىنداعى 178 ادامنىڭ جالاقىسىن تولەۋى تۇرتكى بولعان.  راسىندا، كينوستۋديانىڭ بيۋدجەتى تاپشى ەكەنىن مويىندادى.
«ءقازاقفيلمنىڭ» پرەزيدەنتى رەتىندە مەنىڭ باستى مىندەتىم — 178 ادامنىڭ ايلىعىن تاۋىپ بەرۋ. جالعا بەرەم بە، ءوزىمدى ساتام با، جوق الدە باسقا دا جۇمىس ىستەيمىن بە، جالپى مەنىڭ مىندەتىم. سوندىقتان دا  مەن بارىنشا وسىنداي جۇمىستار ارقىلى، كينودان دا باسقا جۇمىستار ارقىلى 178 ادامنىڭ ايلىعىن تاۋىپ بەرۋىم كەرەك. بۇل كادىمگى تاكسوپارك. ەشقانداي دا، بۇل جەردە ماشينا ساتىلمايدى. بۇل اۆتوسالون ەمەس»، – دەيدى ازامات ساتىبالدى.

«امالسىز جالعا بەردىك» دەگەندى جەلەۋ ەتكەن ول كەلىسىمشارتقا وتىرعان كومپانيادان «قازاقفيلم» بيۋدجەتىنە قانشا اقشا تۇسەتىنىن جاۋاپسىز قالدىردى. «زاڭعا قايشى ەشنارسە جوق» دەپ، اڭگىمەنى جىلى جاپتى. وسىلايشا قارجىدان قىسىلعان شاكەن ايمانوۆ اتىنداعى كينوستۋديا بۇل كۇنى جالعا بەرۋمەن جانىن باعۋعا ءماجبۇر كورىنەدى.

ال ءانشى مەرۋەرت تۇسىپبايەۆا بۇل جاعدايعا ءوز پىكىرىن ءبىلدىرىپ، ساتىبالدىنىڭ اقشا تابۋ ءۇشىن جاساعان امالىن سىناعان.

"كەزىندە، ازامات ساتىبالدى، ەسەنتايەۆانىڭ "بايان سۇلۋ - قوزى كورپەش" سەريالىن سىناعانىمدا، مەنى "حايپ قۋىپ وتىر" دەپ سۇحبات بەرىپ ەدىڭ! اقىرى ول سەريالدى كورسەتۋگە تىيىم سالىندى. ەندى، "كتك"- عا سۇحبات بەرىپ ، "مەن ءوزىمدى ساتام با، ونى ءوزىم بىلەمىن" دەپسىڭ ، "پاجالىستا"، ءوزىڭدى سات! قارا شاڭىراقتان قولىڭدى تارت! مەنىڭ اتام، شاكەن ايمانوۆ اتىنداعى قارا شاڭىراقتىڭ اۋلاسىن "قىتايدىڭ كولىكتەرىنە تولتىرام با، ونى جارنامالايمىن با، ءوز ەركىم" دەپسىڭ! جۇڭگو كولىگىن كىرگىزگەنىڭ – قاقپانى قىتايلارعا اشقانىڭ! ويلان، باستا داۋرەن تۇرمايدى، باۋىرىم. اسىرا سىلتەمە! قانشاما "كرىشام پلوتنىي" دەگەندەر اباقتىدا وتىر. ارىستانبەكتىڭ ومىرىنە ءۇڭىل. سەنەن بۇرىن دا "قازاقفيلم" بولعان، قىتايدىڭ كولىكتەرىن اۋلاعا قويماي-اق كۇن كورگەن. قولىڭنان كەلمەسە، ورىندى بوسات! ءوز ەركىڭ سودان كەيىن، قىتايدىڭ كولىگىن سات، ءوزىڭدى سات. تەك ارىڭدى ساتپا، باۋىرىم! اقشا تابىلادى عوي، ابىروي قىمباتتىراق! "ءقازاقفيلمنىڭ" تۇرعان جەرى مىقتى، تالاي اشكوز ءۇي سالامىن دەپ كوز تىگۋدە، ول دا بار. كىم بىلەدى؟ قاي ماقساتپەن ازامات ساتىبالدى قارا شاڭىراقتى جۇڭگو "اۆتوبازارىنا" اينالدىرىپ وتىر؟! سۇراق كوپ، سەن "ءقازاقفيلمدى" قۇردىمعا كەتىرىپ، باي-باعلاندار ءۇي، ۆيللا سالۋ ءۇشىن كەلدىڭ بە؟ شىنىڭدى ايت، اسپاننان جەرگە ءتۇس!" –دەپ اشۋلاندى مەرۋەرت تۇسىپبايەۆا.

اقپارات دەرەككوزى: https://massaget.kz/layfstayl/98878/
بۇل ماقالا تۋرالى نە ويلايسىز؟