ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ساردارعا ەسكەرتكىش تاقتا ورناتىلدى

25 جەلتوقسان 2023 79
2023 جىلدىڭ 23 جەلتوقسانىندا ساياسي عىلىمدارىنىڭ دوكتورى، پروفەسسور، گەنەرال-مايور ەلۋبايەۆ باۋىرجان ىسقاقۇلىنا اشىلعان ەسكەرتكىشتىڭ سالتاناتتى راسىمىنە سارداردىڭ تۋعان-تۋىستارى مەن كوز كورگەن ارىپتەستەرى جانە شەكارا اكادەمياسىنىڭ باسشىلىق قۇرامى قاتىستى.



ءتورتىنشى وقۋ كورپۋسىنىڭ الدىنداعى گرانيت تاستان ورناتىلعان مەموريالدىق ەسكەرتكىشتىڭ اشىلۋىنا سەبەپكەر بولعان، كەزىندە وسى وقۋ ورداسىن 2005-2009 جىلدارى باسقارعان گەنەرال-مايور ب.ەلۋبايەۆتىڭ ۇل-قىزدارى دەمەۋشىلىك جاساپ، اكەلەرىنىڭ اتىن اسقاقتاتتى.

شارا بارىسىندا العاش بولىپ ءسوز العان پولكوۆنيك پ.پوليۆانوۆ عالىمنىڭ قىزمەتتىك-جاۋىنگەرلىك ءجۇرىپ وتكەن جولىنا توقتالىپ، ونىڭ وقۋ ورداسىنا ولشەۋسىز ۇلەس قوسقان ەڭبەك جولىن اڭگىمەلەدى. سودان كەيىن ءسوز كەزەگىن باۋىرجان ىسقاقۇلىمەن بىرگە قىزمەت اتقارعان ارىپتەستەرى الدى. زاپاستاعى گەنەرال-مايور اتشاباروۆ ناعاشىباي قورعانبەك ۇلى:

«باۋكەڭمەن 1985-1986 جىلدارى الماتىدا تانىستىم. اۋعانستاننان ەلگە ورالعانمىن. شەنىم – كاپيتان ەدى. ول كەزدە ۇلتتىق قاۋىپسىزدىك كوميتەتى كگب (مەملەكەت قاۋىپسىزدىك كوميتەتى) بولاتىن. كوميتەت ءتوراعاسى ماسكەۋدەن كەلگەن گەنەرال-مايور ميروشنيك ۆيكتور ميحايلوۆيچ اتتى وتە قاتال كىسى ەدى. باۋكەڭ ءتوراعانىڭ كومەكشىسى قىزمەتىندە ەكەن. ول كەزدە ءتوراعانىڭ كومەكشىسى دەگەن ستاتۋس قازىرگىدەن مۇلدە باسقا ەدى. ءقازىر كومەكشى دەگەنىڭىز بارىپ كەل-شاۋىپ كەلدىڭ ادامدارى عوي. ول كەزدە كومەكشى دەگەنىڭىز باسشىنىڭ كەم دەگەندە جارتى جۇمىسىن اتقاراتىن. اقپاراتتاردى تالداۋ، سارالاۋ، سول ارقىلى قورىتىندى شىعارىپ، ناتيجەسىن كورسەتىپ وتىرۋ سىندى جۇمىستاردىڭ بارلىعىن كومەكشى اتقاراتىن. باۋكەڭ سول جۇمىسىن ءمىنسىز اتقارا الدى. ءوزىنىڭ ىشكى مادەنيەتى مەن مىقتىلىعىنىڭ ارقاسىندا قاتالدىعىمەن اتى شىققان ۆيكتور ميروشنيك وزگەلەرگە كورسەتەتىن مىنەزىن باۋكەڭە كورسەتپەيتىن، وزگەلەرگە ايتقان ءسوزىن باۋكەڭە ايتپايتىن.



سول كەزدەن بەرى ول كىسىنىڭ ءوسۋ جولدارى كوز الدىمدا ءوتتى. ول دا ءوزىنىڭ قىزمەتى ارقىلى مەنى باقىلاپ وتىردى. سول جىلدارى باۋكەڭ مەنى ۇلتتىق قاۋىپسىزدىك كوميتەتى ورتالىق اپپاراتى دەپارتامەنتتەرىنىڭ بىرىنە باسشىلىق قىزمەتكە ۇسىنىپ، اتقارعان شارۋالارىمدى، جاساعان جۇمىستارىمدى كورسەتكەندە قاتتى تاڭ قالدىم»، - دەيدى ول وتكەن شاققا ورالىپ.

ماتەريالدى دايىنداۋ بارىسىندا باۋىرجان ىسقاق ۇلى تۋرالى ەستەلىكتەر جازىلعان «كەڭدىك.» بيىكتىك. تەرەڭدىك. اتتى كىتاپتى پاراقتاپ وتىرىپ ول كىسىنىڭ ۇلتتىق قاۋىپسىزدىك كوميتەتىندە مەملەكەتتىك ءتىلدى دامىتۋ باسقارماسىنا دا جەتەكشىلىك جاساعانىن وقىدىم. انا ءتىلىنىڭ ناعىز جاناشىرى رەتىندە ونىڭ ۇقك ورگاندارىندا كەڭ قولدانىلۋىنا، ءىس-قاعاز اينالىمىنا تەز ەنۋىنە كوپ ەڭبەك سىڭىرگەن. بۇل تۇرعىدا سارداردىڭ كوزىن كورگەن ارىپتەستەرىمنىڭ ايتۋىنشا، ول كىسى شەكارا اكادەمياسىندا قىزمەت اتقارعان جىلدارى قازىرگى ءتىل ساياساتى ءبولىمى، بىلدەي ءبىر باسقارماعا اينالعان ەكەن. بۇدان اعامىزدىڭ ناعىز ءتىل جاناشىرى بولعانىن بايقاۋعا بولادى.

قىزمەت بارىسىندا دا، جەكە ومىرىندە دە ونەگەلى عۇمىر كەشكەن باۋىرجان ىسقاق ۇلىنىڭ كەمەل قاسيەتتەرى، قالدىرعان ءىزى تۋرالى كوپ ايتۋعا بولادى.

ۇلتتىق قاۋىپسىزدىك سالاسىندا، اسىرەسە، شەكارا اكادەمياسىندا باسشىلىق ەتكەن جىلدارى اكادەميا ءومىرىنىڭ گۇلدەنۋىن اسكەري قىزمەتشىلەر اۋزىنان تاستاماي ايتىپ ءجۇر.

شارا سوڭىندا ب.ەلۋبايەۆتىڭ بالالارى اكادەمياداعى كەلۋشىلەر بولمەسىنە داستارحان جايىپ، جينالعان قوناقتارعا ءدام اۋىز تيگىزدى.

ولاي بولسا، باۋىرجان اعامىزدىڭ سالعان ءىزى، جاساعان ءىسى، كورسەتكەن ونەگەسى ماڭگى جاسايتىنىنا سەنىمدىمىز.

جانات جابىربەكوۆ،

ق ر ۇقك شەكارا اكادەمياسىنىڭ باسپا ءسوز حاتشىسى

 

 

 

 

 

 

 
بۇل ماقالا تۋرالى نە ويلايسىز؟