وبلىس اكىمىنىڭ ورىنباسارى باقىتجان باياحمەتوۆ 2024 جىلعى سۋ تاسقىنى كەزەڭىنە دايىندىق بويىنشا كەڭەس وتكىزدى. جيىندا قۋاتبەك كەنجەبەك ۇلى «2024 جىلعى سۋ تاسقىنى كەزەڭىنە دايىندىق بويىنشا ينجەنەرلىك جۇمىس جوسپارى» بەكىتىلگەنىن اتاپ ءوتتى.
بۇگىندە 36 ءىس-شارانىڭ 27ء-سى ىسكە اسىرىلدى. وبلىستا 71 سۋ تاسقىنى ءقاۋپى بار ەلدى مەكەن انىقتالدى. 15 ەلدى مەكەندە ءقاۋىپ جويىلدى، 49 ەلدى مەكەندە ءقاۋىپ ازايتىلدى، - دەدى شقو تجد باسشىسىنىڭ ورىنباسارى.
ونىڭ ايتۋىنشا، ەلدى مەكەندەرگە كوكتەمگى سۋ تاسقىنى ءقاۋپى تونگەن جاعدايدا 2 334 ادامنان تۇراتىن بريگادالار مەن ازاماتتىق قورعاۋ قىزمەتى، 735 تەحنيكا، 50 ءجۇزۋ قۇرالى جانە 208 موتوپومپا دايىندالدى. توتەنشە جاعدايدان زارداپ شەككەن حالىقتى قابىلداۋ ءۇشىن 8 448 ادام سىياتىن 89 ۋاقىتشا ورنالاستىرۋ پۋنكتى انىقتالدى.
«قازگيدرومەت» رمك شىعىس قازاقستان، اباي وبلىستارى بويىنشا فيليالىنىڭ ديرەكتورى ءلاززات بولاتقان بۇگىندە مارقاكول جانە شەمونايحا اۋداندارىندا، ريددەر قالاسىندا جانە سامار اۋدانىندا قار كوپ جاۋعانىن اتاپ ءوتتى.
كەڭەستىڭ قورىتىندىسى بويىنشا باقىتجان باياحمەتوۆ ەلدى مەكەندەردەن قاردى ءقاۋىپسىز جەرگە ۋاقىتىندا شىعارۋعا، جارىلىس جۇمىستارىن جۇرگىزۋ ءۇشىن ۋچاسكەلەردى انىقتاۋعا، ارىقتاردى، كارىز جۇيەلەرىن، اۆتو جانە تەمىر جولدار استىنداعى سۋ وتكىزەتىن نىسانداردى تازارتۋعا تاپسىرما بەردى.
